Дойду бэрэсэдьиэнэ Владимир Путин көҕүлээбит «Култуура» национальнай бырайыагын чэрчитинэн, Нерюнгри оройуонугар куукула тыйаатырын хапытаанай өрөмүөнэ сыл бүтүөр диэри түмүктэниэҕэ. Үлэни толорорго 46,9 мөл. солк. тахса үп көрүллүбүтэ.
Бу үбүнэн дьиэни ититтилэр уонна фасадын бүрүйдүлэр, тас кирилиэһин өрөмүөннээтилэр, саҥа киирэр ааннары туруордулар, ититии систиэмэтин, түннүктэри, муоста уонна истиэнэ бүрүөһүнүн уларыттылар.
Дьиэ ис өттүгэр өрөмүөн үлэтэ салҕанар. Куукула тыйаатырын уус-уран салайааччыта уонна дириэктэрэ Петр Скрябин бэлиэтээбитинэн, национальнай бырайыак көмөтүнэн, 1985 сыллаахха тутуллубут улахан дьиэҕэ коллектив үлэлииригэр, ону таһынан көрөөччүлэргэ эмиэ усулуобуйа биллэ тубуста.
