Нерюнгри куорат бэс ыйын 18-20 күннэригэр «Бакалдын» эбэҥки норуоттар икки ардыларынааҕы бырааһынньыгын ылыаҕа. Тэрээһин Россия норуоттарын сомоҕолоһууларын сылын уонна Саха сиригэр култуура сылын чэрчитинэн буолуоҕа. Тэрээһиҥҥэ бэлэмнэнии өрөспүүбүлүкэ баһылыга Айсен Николаев көһө сылдьар сүбэ мунньаҕын биир тиэмэтинэн буолла.
Улахан норуоттар икки ардыларынааҕы, регионнар икки ардыларынааҕы уонна өрөспүүбүлүкэтээҕи тэрээһиннэр Саха сирин киин куоратыгар эрэ буолбакка, атын да нэһилиэнньэлээх пууннарга ыытыллыахтаахтар, диир Айсен Николаев. Маннык событиелар сайдыыны тосхойоллор диэн тоһоҕолоон бэлиэтээтэ. Холобур быһыытынан регион баһылыга 2025 сыллаахха Нерюнгрига үрдүк тэрээһиннээх таһымҥа ыытыллыбыт Олоҥхо ыһыаҕын эттэ. Кини тэрээһинигэр тыһыынчанан киһи кыттыбыта, бөдөҥ эбийиэктэр тутуллубуттара.
«Нерюнгри оройуона түргэнник сайдар, өрөспүүбүлүкэҕэ эрэ буолбакка, бүтүн Уһук Илиҥҥэ үүнүү-сайдыы киинэ буолар. Бу сайдыы үөрэх, доруобуйа харыстабыла, сынньалаҥ уонна спорт курдук дьон олоҕун хаачыстыбатыгар көстөр. Манна тэриллэр инфраструктура араас таһымнаах – норуоттар икки ардыларынааҕы, бүтүн Россиятааҕы уонна өрөспүүбүлүкэтээҕи тэрээһиннэри ыытар кыаҕы биэрэр. Былырыын Нерюнгри олохтоохторо өрөспүүбүлүкэтээҕи Олоҥхо ыһыаҕын үрдүк таһымҥа ыыппыттара. Маннык дьаһаллар оройуоҥҥа болҕомтону тардыыга уонна кини сайдыытыгар көмөлөһөллөр. Уопсай күүһүнэн “Бакалдын” аан дойдутааҕы эбэҥки бырааһынньыгын саамай үрдүк таһымҥа ыытыахпыт диэн эрэнэбин», — диэн Айсен Николаев бэлиэтээтэ.
Нерюнгрига «Бакалдын» бырааһынньыгы ыытар көҕүлээһини оройуон баһылыга Роман Щегельняк оҥорбута. Биир сүрүн төрүөтэ — Иенгра сэлиэнньэ үйэлээх үбүлүөйэ быйыл бэлиэтэнэр. Нэһилиэнньэлээх пууҥҥа эбэҥки баай тыллаах эйгэтэ толору баар. Манна «Икэнипкэ» уонна «Хуктывун» (табаһыт күнэ) диэн национальнай бырааһынньыктар хаста да ыытыллыбыттара.
Щегельняк этэринэн, Бакалдын кэнсиэпсийэтэ оҥоһуллубут, итиэннэ сиэр-туом дьаһалларын, быыстапкаларын, кэнсиэртэрин таһынан, дьыалабыай чаастаах бырагыраама оҥоһуллар.
Саха сирин Арктикатын сайыннарыыга уонна Хотугу норуоттар дьыалаларыгар миниистир Владимир Черноградскай Нерюнгри куоракка «Бакалдын» аан дойдутааҕы эбэҥки национальнай бырааһынньыгын кыттыылаахтарынан Хотугу сир төрүт олохтоох аҕыйах ахсааннаах норуоттарын бэрэстэбиитэллэрэ, бастатан туран, Арассыыйа Федерациятын 10 субъегыттан уонна Саха сирин 9 муниципальнай оройуонугар түөлбэлээн олорор эбэҥкилэр, ону тэҥэ Кытайтан уонна Монголияттан кэлбит дэлэгээссийэлэр буолуохтара диэн эттэ.
Санатар буоллахха, дойду президенэ Владимир Путин Россияҕа норуоттар сомоҕолоһууларын сылын арыйан туран, саамай кылаабынайа Россияҕа тастан киирбит омуктарга муҥура суох ытыктабыл, кинилэр култуураларыгар, үгэстэригэр, кинилэр духуобунай сыаннастарыгар толору убаастабыл баар буоларын тоһоҕолоон бэлиэтээбитэ уонна ол иһин үйэ-саас тухары Россия дьонугар сыаннастар уопсай буолалларын эппитэ.
Саха сиригэр 135 омук уонна этническай бөлөх бэрэстэбиитэллэрэ олороллор. 21 муниципальнай оройуон 70 нэһилиэнньэлээх пуунугар хоту дойду төрүт омуктара — эбэҥкилэр, эбээннэр, чукчалар, долгааннар, дьүкээгирдэр олороллор. Өрөспүүбүлүкэ — омуктар ыккардыларынааҕы сөбүлэҥи бөҕөргөтөр бөдөҥ событиелар миэстэлэрэ. Ол курдук, 2025 сыл бэс ыйыгар XXV Федеральнай Сабантуй ыытыллыбыта. Онно 50 тыһыынча кэриҥэ киһи кыттыбыта, олор истэригэр – Россия 29 регионуттан ыалдьыттар.
This post was published on 11.02.2026 11:14 11:14