Бүгүн Нерюнгри куорат аэропордугар Гавриил Иосифович Чиряев аатын иҥэриигэ туһуламмыт үөрүүлээх тэрээһин буолла, диэн Саха сирэ суруйар.
Санатан эттэххэ, ааспыт ыйга Владимир Путин Гавриил Чиряев аатын Нерюнгри аэропуордугар иҥэрэр туһунан ыйаахха илии баттаабыта.
— Дойду Аҕа баһылыга Владимир Путин бу быһаарыныыта Нерюнгри куорат төрүттэммитэ 50 сылыгар итиэннэ уһулуччулаах киһибит Гавриил Иосифович Чиряев төрөөбүтэ 100 сылыгар дьоһун бэлэҕинэн буолла. Билигин ытык киһи аата Нерюнгрины кытта үйэтитилиннэ, бу өйдүү-саныы сылдьыы, махтал уонна көлүөнэттэн көлүөнэҕэ үйэтитии бэлиэтинэн буолар, — диэн Айсен Николаев ТГ ханаалыгар суруйда.
«Нерюнгри» аэропуордун саҥа дьиэтэ 2023 с. ахсынньыга арыллыбыта. Терминал уопсай иэнэ 9 тыһ. кв.м. Бастакы мэндиэмэҥҥэ регистрацияланар сир, көрөр пууннар, малы-салы уурдарар сир, уо.д.а. бааллар. Иккискэ — пассажирдар күүтэр саалалара, остолобуой, оҕо уонна ийэ хоһо, уо.д.а. киирэллэр.
