Балаҕан ыйын 9 күнүн туругунан, Саха сиригэр уопсайа 44 тыһ. га иэннээх сиргэ 6 ойуур баһаара умайа турар, НВК Саха телеграм-ханаал суруйар.
Суукка иһигэр 0,07 га иэннээх 1 ойуур баһаарын умуруордулар. Маны тэҥэ 41 744 га иэннээх 2 уоту төгүрүйдүлэр.
Баһаары умуруоруу үлэтигэр 281 киһи уонна 30 тиэхиньикэ кыттар.
Үөһээ Бүлүү улууһугар 2 ойуур баһаара сүрүн салалта кэтэбилигэр сылдьар.
«Суукка иһигэр баһаар ахсаана 2 уотунан элбээтэ, онтон иэнэ 710 ганан улаатта. 43,9 тыһ. га иэннээх 3 улахан баһаар өссө да баар. Космостан (НЦУКС) кэтээн көрүүнэн, буруо суоҕа бэлиэтэнэр. Нэһилиэнньэлээх пууннарга куттал суох», — диэн РФ ЫБММ Саха сиринээҕи салаатын Сүрүн управлениетын салайааччыта Павел Гарин эттэ.
This post was published on 09.09.2024 13:56 13:56