Дьокуускайга Ленин проспегынан Олоҥхо марафона ыытылынна. Сүүрүү Россия уонна Саха сирин 100 килэмиэтиргэ чемпионаттарын кытары тэҥҥэ буолла. Марафон кыттыылаахтара национальнай таҥастарын кэтэн сүүрдүлэр, диэнН ЯСИА иһитиннэрэр.
«100 килэмиэтиргэ Россия чемпионатын, Саха сирин чемпионатын уонна Олоҥхо марафонун ытыктабыллаах кыттыылаахтара, өрөспүүбүлүкэ баһылыгын уонна бырабыыталыстыбатын аатыттан спорт бырааһынньыгынан эҕэрдэлиирбин көҥүллээҥ. Бу бэртээхэй спорт көрүҥэ, кыттааччылартан муҥутуур тулуурдаах буолууну, тыын күүһүн, энергияны, бириэмэни сөпкө ааҕыыны эрэйэр экстремальнай, ол иһин олус интэриэһинэй. Ол иһин өрөспүүбүлүкэ бу чемпионаты ыытар быһаарыыны ылынары ситиспитэ», — диэн бэлиэтээтэ үөрүүлээх түгэҥҥэ Саха сирин бырабыыталыстыбатын бэрэссэдээтэлин солбуйааччы Сергей Местников.
Кини үс күрэхтэһии бары тэрийээччилэригэр махтанна, ону тэҥэ кыттааччылары чемпионаттарга ситиһиилэринэн эҕэрдэлээтэ.
Сергей Местников Саха сирин чэпчэки атлетика Федерациятын толорооччу дириэктэрэ Василий Спиридоновка «Гражданскай килбиэн» бэлиэни туттарда.
Олоҥхо марафонун күнүскү бырагырааматыгар кыттааччылар үс дистанцияны — 4 уонна 8 км сүүрдүлэр, ону тэҥэ национальнай таҥаһынан 4 км аастылар. Бу тыһыынчаттан тахса чэпчэки атлетиканы таптааччылар кыттыыны ылбыт саамай маассабай дистанциялара буолла.
