2025-2026 сыллардааҕы Саха сирин үөрэнээччилэрин Спартакиадатын балаһыанньатыгар илии баттанна. Күрэхтэһии бырагырааматыгар национальнай многоборьены киллэрии сонун буолла, диэн ЯСИА иһитиннэрэр.
«Национальнай многоборье кэнники сылларга оскуола саастаах спортсменнарга улахан сэҥээриини ылар. Үгэстэри тутуһаары, спорт бу көрүҥүн киэҥник тарҕатаары, Саха сирин оскуолаларын үөрэнээччилэрин Спартакиадатын бырагырааматыгар киллэрилиннэ», — диэн «Юные якутяне» өрөспүүбүлүкэтээҕи ресурснай кииҥҥэ кэпсээтилэр.
Оскуола оҕолорун ортолоругар национальнай многоборье күрэхтэһиилэрэ чэпчэтиллибит киэпкэ ыытылларын бэлиэтиибит. Ол эбэтэр кинилэр бырагыраамаларыгар тааһы көтөҕүү, ох саанан ытыы суох, кыргыттар хапсаҕай киирбэт.
2025-2026 сыллардааҕы үөрэнээччилэр спартакиадалара үс түһүмэҕинэн ыытыллыаҕа. Бастакы түһүмэх уопсай үөрэх тэрилтэлэригэр сыл устата буолуоҕа. Иккиһэ — муниципальнай тэриллиилэр уонна куораттааҕы уокуруктар таһымнарыгар. Үһүс – өрөспүүбүлүкэ күрэхтэһиилэрин чэрчитинэн, сотору ахсынньыга былааннанар. Онно көҥүл тустууга уонна дьахталлар тустууларыгар Николай Тарскай аатынан Саха сиригэр бастыыр иһин күрэхтэһии ыытыллыаҕа. Күрэхтэһии серията 2026 сыл бэс ыйыгар түмүктэниэҕэ.
Спартакиада бырагырааматыгар барыта 29 көрүҥ күрэхтэһии киирдэ. Муниципальнай хамаандалар үөрэнээччи ахсааныгар сөп түбэһиннэрэн, үгэс курдук, түөрт бөлөххө арахсыахтара. Балаһыанньа РРЦ телеграм-ханаалыгар бэчээттэннэ.
This post was published on 12.11.2025 16:39 16:39