Хаартыскаҕа «Агростартап» судаарыстыбаннай бырагыраама 2021 сыллааҕы кыайыылааҕа Мария Иванова көтөрүн ферматыгар сылдьарын көрөҕүт. Бизнес-былаанын олоххо киллэрэ сылдьар туруу үлэһит кыыс оччолорго куонкуруска кыттарыгар эмиэ наһаа долгуйара, ити эрээри тыа сиригэр дохуоту киллэрэр салааны тэрийэр ыра санаатын хамыыһыйа сэҥээрбитэ.
Бу күннэргэ тыа хаһаайыстыбатын министиэристибэтэ «Дьиэ кэргэн пиэрмэтэ» граҥҥа кыттыыга баҕалаахтартан докумуон хомуйар, кулун тутар 16 күнүгэр диэри. Бүгүҥҥү туругунан 12 сайаапка киирбит.
Салгыы «Агростартап» гранын куонкурсугар кыттыыга докумуон хомуллуута саҕаланыаҕа. Былырыын саас буолбута. Быйыл да наһаа уһаппакка ыытыллара былааннанар дииллэр министиэристибэҕэ.
Ресурснай кииҥҥэ бизнес-былаан суруйууга көмөлөһүүгэ сайаапка ахсаана 100-тэн таҕыста. Онон быйыл да тыа сиригэр бэйэ дьыалатын тэрийиигэ субсидиянан өйөбүллээх буолууга анаммыт куонкуруска балачча киһи киирсээри сылдьар.
Санаттахха, былырыын «Агростартап» куонкурусугар 120-тэн тахса сайаапка киирбититтэн, 18 киһи агрогрант ылбыта. Билигин ол дьон бары ситиһиилээхтик үлэлии сылдьаллар.
Мария Иванова — 2021 сыллааҕы Агростартап кыайыылааҕа, 2022 сыллааҕы «Универсальная ферма» регионнааҕы бырагыраама кыттыылааҕа, Бүлүү улууһун олохтооҕо.
Оҕо эрдэҕиттэн көтөрү иитэр ыра санаалаах идэтинэн суруналыыс кыыс билигин «көтөрү иитээччи» иккис идэтин баһылаан, кулун тутар 3 күнүгэр Кыадаҥдаҕа олус суолталаах, хас да хайысхалаах пиэрмэни арыйда.
Мария уонна Владимир Ивановтар пиэрмэлэрин арыллыытыгар тыа хаһаайыстыбатын миниистирэ Александр Атласов кытынна. Кини эбийиэк ситэриллэн тутуллуутугар көрсүбүт ороскуот 90%-гар тиийэ «возмещение части затрат» бырагыраамаҕа киирсиэн сөбүн эрэннэрдэ.
Миниистир Александр Атласов үлэ хайдах аттарыллан, сааһыланан, былааннанан барыахтааҕын сиһилии кэпсэттэ. Мариялаах Владимир пиэрмэлэрин «с нуля» бэйэлэрин илиилэринэн-атахтарынан тутан-хабан таһаарбыт буолан, туох ситиһиллибитин, туох кыаллыбакка турарын кэпсээтилэр.
