15 От ыйа 15.07
  • 18°
  • $ 87,74
  • 95,76

Наталья Посельская сиэнэ Алисия Пак ситиһиитэ!

09:53, 18 апреля 2018
Текст:
Читайте нас на
Яндекс Новости
ЯДВ

Соторутааҕыта Казахстаҥҥа, Алматы куоракка Хореографическай үөрэх кыһаларын «Өрлеу» VI норуоттар икки ардыларынааҕы куонкурустара буолан ааста.

edersaas.ru

Бу куонкуруска Аксения уонна Наталья Посельскаялар ааттарынан Дьокуускайдааҕы балетнай оскуола (колледж) үөрэнээччилэрэ лауреат үрдүк аатын сүгэн, улахан ситиһиилэнэн кэллилэр.

Быйылгы куонкурус  «Өрлеу» төрүттэммитэ 10 сылыгар анаммыт буолан, кыайыы, ситиһии суолтата, биллэн турар, өссө улаатан, ыйааһыннанан тахсыбыта чахчы.

Дьүүллүүр сүбэ бэрэссэдээтэлэ – РФ искусствотын үтүөлээх деятелэ, «Балет» сурунаал кылаабынай эрэдээктэрэ, профессор Валерия Уральская (Россия). Чилиэннэр – Арассыыйа, Турция, Япония, Узбекистан, Казахстан, ЮАР хореографическай искусстволарын биллиилээх деятеллэрэ. Маннык киэҥ, дьоһун састааптаах дьүүллүүр сүбэҕэ биһиги биир дойдулаахпыт, Саха Өрөспүүбүлүкэтин үтүөлээх артыыһа, чинчийээччи-педагог, Аксения уонна Наталья Посельскаялар ааттарынан Дьокуускайдааҕы балетнай оскуола дириэктэрэ Дария Дмитриева (Арассыыйа) киирэн үлэлээбитэ олус кэрэхсэбиллээх.

Алматы устун

Куонкуруска 7 араас дойду хореографическай үөрэҕин кыһаларыттан 147  үрэнээччи уонна устудьуон кытынна. Куонкурсаннар үс номинацияҕа күөн көрүстүлэр: «Классическай үҥкүү», «Норуодунай үҥкүү» уонна «Аныгы хореография».

Дьэ бу үс номинацияҕа барытыгар кыттан, Саха сирин балетнай оскуолатын төрүттээччи Наталья Семеновна Посельская сиэнэ кыыс Алисия Пак  “аныгы хореографияҕа” – I, “классическайга” –III, “норуодунайга” –III бириэмийэлэри ылан, учууталларын үөртэ. Алисия аччыгый бөлөххө куонкурустаста. Кини педагога – СӨ үтүөлээх артыыската Д.Г.Иванова.

Улахаттар бөлөхтөрүгэр “классическайга” I  бириэмийэни ылары 2-с куурус устудьуона Никита Рогов ситистэ. Педагога —  СӨ норуодунай артыыһа  Д.Н.Дмитриев.

Аччыгый бөлөххө “классическайга”  I бириэмийэни Иван Одинцов ылла. Педагога – СӨ үтүөлээх артыыската  З.Н.Попова.

“Аныгыга” III бириэмийэни ылары улахаттар бөлөхтөрүгэр 3-с куурус устудьуона Октябрина Дьячкова (педагог СӨ үтүөлээх артыыската Д.И.Дмитриева) уонна “аныгыга” эмиэ III бириэмийэни ылары 1-кы куурус устудьуона Петр Портнягин (педагог СӨ үтүөлээх артыыһа А.Д. Попов) ситистилэр.

Маны таһынан, дипломаннар бааллар. “В” бөлөххө быйыл аан бастаан 7-9 саастаах оҕолор кытыннылар. Ол курдук, саамай кырачаан куонкурсанка – бэлэмнэнии бөлөҕүттэн Ева Фрель куонкурус дьүүллүүр сүбэтин грамотатын тутта.

Балетмейстер, РФ уонна СӨ үтүөлээх артыыската Екатерина Тайшина “Ааптарыскай хореография иһин”  дьүүллүүр сүбэ анал бирииһинэн наҕараадаланна.

  • Норуоттар икки ардыларынааҕы Дьүүллүүр сүбэ.  Бастакы кэккэҕэ хаҥастан бастакы Д.И.Дмитриева

    — Бу улахан куонкуруска быйыл биһиги төрдүс сылбытын кыттабыт. Саха сирин араас улуустарыттан оҕолор – үөрэнээччилэрбит бааллар. Октяҕа уонна Петяҕа (норуодунай үҥкүү) нүөмэрдэр анаан туруорулуннулар: “Жасырынбак” казахскай үҥкүүнү биһиги Казахстаннааҕы доҕорбут Медет Агабылов, оттон “Туундара үөрүүтэ” үҥкүүнү “Гулун” ансаамбыл уус-уран салайааччыта Любовь Никитина туруордулар. Биһиги кинилэргэ махталбыт муҥура суох.

Н.С.Посельская аатынан бириэмийэ лауреаттара Наталия Чибыева уонна кини үөрэнээччитэ тыйаатыр солиһа Тимофей Федотов

Көрөрбүт курдук, Саха Өрөспүүбүлүкэтин балетнай искусствотын историятыгар аан бастаан, Аксения уонна Наталья Посельскаялар ааттарынан балетнай оскуола иитиллээччилэрэ,  бары үс номинацияҕа бириистээх миэстэлэргэ таҕыстылар. Бу дьоһуннаах куонкурус Абай аатынан Судаарыстыбаннай академическай опера уонна балет тыйаатырын сценатыгар наҕараадалааһын сиэринэн-туомунан итиэннэ лауреаттар Гала-кэнсиэртэринэн түмүктэннэ. Биһиги иитиллээччилэрбит, академичнай, техничнэй, чаҕылхай  үҥкүүлэринэн көрөөччүлэргэ сөбүлэтэн,  дохсун ытыс тыаһынан доҕуһуоллатан, лауреат аатын чиэстээхтик дакаастаатылар.

СӨ үтүөлээх артыыската Дария Иванова, үөрэнээччитэ Алисия Пак уонна Н.С.Посельская кэргэнэ Х.А.Сметанин.

Биһиги, норуоттар икки ардыларынааҕы үөрэҕирии-култуурунай биир кэлим  эйгэтин үөскэтэр сыалтан уонна аан дойду балетнай оскуолаларын кытта сибээһи бөҕөргөтөр туһуттан — Алматытааҕы А. Селезнев аатынан хореографическай училище итиэннэ А., Н. Посельскаялар ааттарынан Дьокуускайдааҕы балетнай оскуола (колледж) бииргэ үлэлэһэргэ илии баттастыбыт, — диэн кэпсээтэ Дьокуускайдааҕы хореографическай колледж дириэктэрэ Дария Ивановна Дмитриева.

Бу улахан куонкурустан кыайыы көтөллөнөн кэлээт, үөрэнээччилэр бука бары муус устар 12 күнүгэр, Хореографическай колледжы төрүттээччи,  бастакы  дириэктэр Наталья Посельская сырдык аатыгар аналлаах История уруогар кытыннылар.

 

Татьяна МАРКОВА, edersaas.ru

 

ЫСПЫРААПКА

«Өрлеу» (“Восхождение”) куонкуруһу 2008 сыллаахха Алматытааҕы А. Селезнев аатынан хореографическай училище уонна Култуура евразийскай фондата тэрийбиттэрэ.  Бу, 2 сылга биирдэ ыытыллар куонкурус Генеральнай партнерунан Казахстан Өрөспүүбүлүкэтин Бастакы Бэрэсидьиэнин фондата — Елбасы буолар.

 

0

0
Следите за самым важным и интересным в Telegram-канале и WhatsApp-группе ЯСИА