Николай Тарскай Саха сиригэр физкультурнай хамсааһыны төрүттээччилэртэн биирдэстэрэ, өрөспүүбүлүкэҕэ көҥүл тустуу сайдарыгар сүҥкэн өҥөлөөх киһи. «Тустуу, бокс, штанга курдук олимпийскай көрүҥнэргэ сахалар аан дойдуга биллиэхпитин сөп эбит», — диэн бастакы специалистары бэлэмнииргэ, секциялары арыйыыга үгүс үлэни ыыппыта, маҥнайгы күрэхтэһиилэри, чемпионаттары тэрийбитэ.
Улуус баһылыга Александр Атласов тохсунньу 11 күнүнээҕи 03-р №-дээх дьаһалынан өрөспүүбүлүкэтээҕи күрэхтэһиини тэрийиигэ уонна бэлэмнээһиҥҥэ анал кэмитиэт тэриллэн үлэни ыытар. Ол курдук, тохсунньу 22 күнүгэр күрэхтэһиигэ бэлэмнэнии хайдах ыытылларын билиһиннэрдилэр. Тэрээһин үлэ хайысхаларыгар эппиэтинэстээх дьон сыһыарылыннылар.
Кыайыылаах хамаандаларга бириистэри, кубоктары, мэтээллэри СӨ Спордун министиэристибэтэ туруорар. Оттон ыйааһыннарыгар бастаабыттарга, призердарга харчынан бириистэри «Нам улууһа» МО, «Нам улууһа» МО депутаттарын Сэбиэтэ уонна улуус нэһилиэктэрин баһылыктара туттарыахтаахтар. Күрэхтэһии кэмигэр күрэхтэһээччилэр, ыалдьыттар «Эрэл» пищекомбинакка, спорт саалаҕа баар остолобуойга аһыахтара. Күрэхтэһиини телевидениеҕэ быһа эфиринэн көрдөрүүгэ кэпсэтии ыытыллар.
This post was published on 26.01.2016 11:15 11:15