Кириэс-Кытыл нэһилиэгэр 220 үөрэнээччигэ аналлаах 50 миэстэлээх интернаттаах аныгы оскуола тутуута түмүктэнэн эрэр. Тутуу бэлэмэ 97,5% тэҥнэһэр. Объект Саха АССР 100 сылын бэлиэтээһин чэрчитинэн тутуллар, диэн регион Тутууга министиэристибэтин пресс-сулууспата иһитиннэрэр.
«Кириэс-Кытыл нэһилиэгэр, Еремеев 17/1 аадырыска турар интернат-оскуола тутуута түмүктэнэрэ чугаһаата. Билигин тас инженернэй ситимнэри, уу резервуардарын уонна носуос станциятын оҥоруутун үлэлэрэ бүтэн эрэллэр. Дьиэ-уот ис өттүнээҕи үлэтэ барыта бүттэ. Үлэһиттэр саҥа оскуола генеральнай ыраастааһынын уонна миэбэллэри миэстэлэрин булларан саҕалаатылар», — диэн тыа сирин объектарын тутууга салайааччыта Владимир Сыроватскай иһитиннэрдэ.
Саҥа интернат-оскуола «үөрэхтээһин» национальнай бырайыак чэрчитинэн тутуллар. Икки этээстээх оскуола уопсай иэнэ — 5 085,8 кв. миэтэрэ, үс блоктан турар: үөрэх кылаастара, спортивнай саала уонна 50 миэстэлээх интернат.
Үөрэх уонна лабораторнай кылаастар таһынан 65 олордуулаах остолобуой, медицина кабинета, библиотека, ааҕар саала уонна кинигэ уурар сир киирэллэр. Оттон улуус ыраах нэһилиэктэриттэн үөрэххэ кэлэр оҕолорго 50 миэстэлээх интернат тутулунна.
Интернат бастакы уонна иккис этээстэригэр дьуһуурунай баспытаатал хоһо, тус маллары уурар хос, таҥас суунар хос, холл, санузел уонна толору хааччылыллылаах 25-тии оронноох 8-тыы утуйар хостор.
Бырайыак чэрчитинэн тулалыыр сири-уоту тупсарыы былааннанар, футбол хонуутун, оонньуур площадкалары тутуу былааннанар. к
