18 От ыйа 18.07
  • 17°
  • $ 88,09
  • 96,3

Нам улууһугар ийэ оҕотунаан ууга былдьаннылар

20:42, 03 июля 2018
Текст:
Читайте нас на
Яндекс Новости
ЯДВ

Ааспыт өрөбүллэргэ өрөспүүбүлүкэҕэ хас да киһи, ол иһигэр, оҕолор ууга түһэн өлбүттэрин СӨ Быыһыыр сулууспата иһитиннэрдэ. Оттон Петуховкаҕа дьуһуурунайдыыр быыһааччылар 8 оҕону ууттан быыһаатылар.


Нам улууһугар бэҕэһээ, от ыйын 2 күнүгэр, 42 саастаах дьахтар 13 саастаах уолунаан киэһэ Романовка диэн сиргэ Өлүөнэ эбэҕэ сөтүөлүү сылдьыбыттар.

Онтон биир түгэҥҥэ оҕото тимирэн киирэн барбытыгар, ийэ барахсан уолун быыһаары ууга ыстаммыт. Ол эрэн, күүстээх сүүрүккэ оҕустаран, оҕотун да кыайан быыһаабатах, бэйэтэ да быыһамматах… Бу эрэйдээхтэр Намҥа ыалдьыттыы тиийэ сылдьыбыт дьон эбит…

Быыһыыр сулууспа иһитиннэрбитинэн, уол өлүгүн тута булбуттар, оттон ийэтин өлүгүн — түүн 23.00 чаас саҕана.


Орто Халымаҕа арыгы иһэн баран, муостаттан өрүскэ ыстанан ууга былдьаммыт киһи өлүгүн от ыйын 1 күнүгэр булбуттара. Кини өлүгүн хас да күн көрдөөн баран, гидролокатор көмөтүнэн булбуттар.

Бэс ыйын 30 күнүгэр Дьокуускайга Петуховка оройуонун үрэҕэр ууга тимирбит эдэр киһи өлүгүн билигин да була иликтэр.

Өрөбүлгэ Быыһыыр сулууспа үлэһиттэрэ ити Петуховкаҕа биэс оҕону, онтон от ыйын 2 күнүгэр үс оҕону быыһаабыттар.

От ыйын 1 күнүгэр Халыма өрүскэ «Крым» мотуордаах оҥочо түҥнэстэн, алта киһи, ол иһигэр, 3 саастаах оҕо, ууга түспүттэр. Улахан дьон быыһаммыттар, оттон уолчаан өлүгүн билигин да көрдүүр үлэ ыытыллар.

Бу чахчынан силиэстийэ уорганнара холуобунай дьыала тэрийбиттэрэ. Барыллаан быһаарыынан, бу дьон итирэн баран, оҥочо уруулугар ол кырачаан оҕону олордубуттар, ол түмүгэр, түҥнэстибиттэр.

Бүлүүгэ от ыйын 1 күнүгэр кыыс оҕону быыһаары, биир киһи былдьаммыт.

Ити күн Жатайга ууга эдэр киһи суорума суолламмыт.

СИА.

Следите за самым важным и интересным в Telegram-канале и WhatsApp-группе ЯСИА