Нам улууһун Нам сэлиэнньэтигэр киин оройуоннааҕы балыыһатын эмтиир корпуһун тутуута салҕанар. Бүгүҥҥү күҥҥэ эбийиэк дойду бэрэсидьиэнэ Владимир Путин көҕүлээбит «Уһун уонна көхтөөх олох» национальнай бырайыагын чэрчитинэн тутуллар, НВК Саха сайт суруйар
Билиҥҥи кэмҥэ корпус тутуутун бэлэмэ 49% тэҥ. Свайалаах тирэҕи, цокольнай сабыыны, монолитнай каркаһы, күрүөнү, канализация хомуйар сирин оҥоруу үлэлэрэ түмүктэннилэр. Ону тэҥэ тас канализация уонна итиини биэрии ситимнэрэ, кырыыһа бэлэмнэр, оттон истиэнэни сыбыы үлэтэ салҕанар.
Бу Нам улууһун бары олохтоохторо уһуннук күүппүт эбийиэктэрэ. Эмтиир корпус аныгы мэдиссиинэ тиэхиньикэтинэн хааччыллыаҕа, ол диагностика уонна эмтээһин саҥа ньымаларын олоххо киллэрэргэ көмөлөһүөҕэ.
«Биһиги, Нам сэлиэнньэтин олохтоохторо, улуустааҕы балыыһа саҥа стационара тутулларыттан олус үөрдүбүт. Дойдубут бэрэсидьиэнигэр Владимир Путиҥҥа эмтиир корпус тутуллар национальнай бырайыагын иһин махталбытын тиэрдэбит. Саҥа балыыһа саамай саҥа, аныгы мэдиссиинэ тэрилинэн хааччыллыаҕа, ол ыарыыны эрдэ булууга уонна сэрэтиигэ көмөлөһүөҕэ диэн эрэнэбит», — диэн Нам сэлиэнньэтин олохтооҕо Надежда Дьячковская санаатынан үллэһиннэ.
СӨ доруобуйаҕа харыстабылын миниистирэ Лена Афанасьева бэлиэтииринэн, «Уһун уонна көхтөөх олох» национальнай бырайыагынан өрөспүүбүлүкэ улуустарыгар улахан мэдиссиинэ эбийиэктэрин тутуу салҕанар.
«Нам сэлиэнньэтигэр эмтиир корпус тутуута — Нам доруобуйатын харыстабылыгар суолталаах түгэн. Саҥа эбийиэк ыарыһахтары эмтээһин уонна медперсонал үлэтин усулуобуйатын тупсарыаҕа, ону тэҥэ мэдиссиинэ көмөтүн үрдүк хаачыстыбалаахтык оҥорорго кыах биэриэҕэ», – диэн министиир бэлиэтээтэ.
Нам киин оройуоннааҕы балыыһатын сүрүн бырааһа Ариан Сергеев бэлиэтииринэн, саҥа корпус аныгы диагностика кабинеттарын оҥорорго, ыарыһахтарга уонна үлэһиттэргэ табыгастаах усулуобуйалары тэрийэргэ, телемедицинскэй технологиялары олоххо киллэрэргэ кыах биэриэҕэ.
«Эмтиир корпус тутуута оройуон нэһилиэнньэтигэр мэдиссиинэ көмөтүн хаачыстыбатын үрдэтэрин таһынан, өрөспүүбүлүкэ доруобуйатын харыстабылын бары систиэмэтин сайдыытыгар күүс биэриэҕэ. Бу биһиэхэ суолталаах бырайыагы олоххо киллэрэри өйөөбүт өрөспүүбүлүкэ салалтатыгар уонна Саха сирин Ил Дарханыгар Айсен Сергеевич Николаевка махталбын тиэрдиэхпин баҕарабын», – диэтэ Ариан Сергеев.
Эмтиир корпус тутуута 2023 сыллаахха саҕаламмыта. Эбийиэк сыбаайаларын үөрүүлээх туруоруутугар Ил Дархан Айсен Николаев кыттыбыта.
Санатарбыт курдук, Саха сиригэр доруобуйа харыстабылын систиэмэтин сайдыыта Россия бэрэсидьиэнэ Владимир Путин стратегическай өйөбүлүнэн инники күөҥҥэ бара турар. 2018 сылтан «Доруобуйа харыстабыла» национальнай бырайыак чэрчитинэн Саха сиригэр 106 саҥа доруобуйа харыстабылын эбийиэгэ олоххо киирдэ, ол иһигэр үс саамай улаханнара — перинатальнай, кардиологическай уонна онкологическай кииннэр.
This post was published on 03.07.2025 12:53 12:53