Нам киинигэр «Доруобуйа харыстабыла» национальнай бырайыагынан эмтэнэр корпус уонна «Үөрэх» национальнай бырайыагынан 450 миэстэлээх оскуола тутулла тураллар. Бүгүн, бэс ыйын 3 күнүгэр, СӨ судаарыстыбаннай сакаасчыт сулууспатын исписэлииһэ Рафаель Семенов уонна «А-Капитал» ХЭТ генеральнай директорын солбуйааччы Александр Ховров тахсан тутуу хаамыытын билистилэр.
Нам улууһун баһылыгын бастакы солбуйааччы Анатолий Павлов, улуустааҕы биир кэлим сакаасчыт сулууспатын дириэктэрэ Алексей Кондаков үлэлээтилэр.
Бастаан эмтэнэр корпуһу көрдүлэр. Уопсайа 3705,34 кв.м иэннээх, үс мэндиэмэннээх таас балыыһа буолар. Тутааччылар ис-тас үлэҕэ күргүөмүнэн үлэлии сылдьаллар. Улуустааҕы киин балыыһа кылаабынай бырааһа Ариан Сергеев ханна туох кабинета, хоһо буоларын сиһилии көрдөрөн кэпсээтэ.
Салгыы 5854,87 кв.м иэннээх, үс мэндиэмэннээх оскуоланы көрдүлэр-иһиттилэр. Манна эмиэ үлэ былаан быһыытынан ыытылла турар.
Аныгы ирдэбилгэ толору эппиэттиир бу икки улахан эбийиэк генаральнай бэдэрээтчитинэн «А-Капитал» ХЭТ буолар. Былаан быһыытынан бу сыл төрдүс кыбаарталыгар үлэҕэ киириэхтээхтэр.
Ааптар: Анна Созонова
This post was published on 03.06.2025 15:07 15:07