Саха сиригэр физкультурнай хамсааһын тэриллибитэ 100 сылынан муус устар 28 күнүгэр Нам улууһугар спорт общественноһын форума ыытылынна. Дьаһал Хатыҥ Арыы нэһилиэгин «Чороон» норуот айымньытын киинигэр буолла.
Киэҥ ыҥырыылаах мунньахха СӨ спорт уонна физическэй культура миниистирэ Леонид Спиридонов, улуус баһылыга Юрий Слепцов, улуустааҕы спорт уонна физическэй культура управлениетын начальнига Павел Иванов, нэһилиэктэр баһылыктар, улуус спордун общественноһа.
Улуус баһылыга Юрий Слепцов улууска спорт сайдыытын, туох үлэ ыытылларын туһунан сырдатта. Миниистир Леонид Спиридонов республика спорка ситиһиитин, цифровизация киириитин туһунан эттэ. Спорт управлениетын начальнига Павел Иванов улууска спорт историятыттан саҕалаан, билиҥҥи кэмҥэ диэри сайдыытын, хаамыытын, саҥа программалар, бырайыактар тустарынан дакылаат оҥордо.
Нам улууһун спордун ветерана Клавдия Шелковникова Үөдэй нэһилиэгэр хайыһар базатын аһыы, спортивнай музей тэрийии, «Олимпик» спортивнай оскуола директора Юрий Балаганскай ситиһиилэр, лааҕыр арыйыы, Нь.С. Тимофеев аатынан Нам сэлиэнньэтигэр республикатааҕы спортивнай олимпийскай эрэллэри бэлэмниир оскуола директорын эбээһинэһин толорооччу Раиса Негнюрова оскуола ситиһиилэрин, былааннарын, Е.М. Шапошников аатынан Хамаҕатта орто оскуолатын директора Анатолий Дьяконов оҕо спордун сайыннарыыга бииргэ сомоҕолоһон үлэлииргэ, улуустааҕы үөрэх управлениетыгар спорт салаатыгар икки үлэһити көрөргө диэн тыл эттилэр.
Мустубут спорт сүгүрүйээччилэртэн Партизан нэһилиэгин баһылыга Алексей Зырянов нэһилиэк спортсаалата олус эргэрэн, онуоха үлэ барарыгар көмө наадатын эттэ уонна Ленскэй нэһилиэк «Лидер» спорт киинин салайааччыта Иван Яковлев нэһилиэктэргэ спорт сайдыытыгар улахан өҥөлөөх спортинструктордар хамнастарын үрдэтиигэ тыл көтөхтө.
Тэрээһин тутаах чааһынан «Нам улууһа» МТ уонна СӨ спорт уонна физическэй культура министерствота бииргэ үлэлэһиигэ Сөбүлэҥ түһэристилэр. Бииргэ үлэлэһии чэрчитинэн үлэ күүскэ ыытыллан, салгыы Нам улууһугар спорт өссө күүскэ сайдыа, чулуу спортсменнар үүнэн тахсан улууспутун, республикабытын, дойдубутун аар-саарга аатырдыахтара диэн эрэнэбит, диэн суруйда СИА-ҕа Анна Созонова, «Нам улууһа» МТ пресс-сулууспата.
