Ыам ыйын 22 чыыһылатыгар — Сайылык күнүгэр — Нам Таастааҕар саха сүөһүтүн дэлэтиигэ үлэлэһэр научнай киин арыллыаҕа. Саҥа эбийиэк «Саха сүөһүтэ» судаарыстыбаннай хааһына тэрилтэ баазатыгар олоҕурар. Манна саҥа сайылык уонна 30 төбө киирэр хотоно тутулунна.
«Тутуу Ил Дархан Айсен Николаев ыйааҕар олоҕуран ыытылынна. Тыа хаһаайыстыбатын сайдыытын инники күөҥҥэ тутуллар хайысхатыттан биирдэстэрэ буолар. Киин саха сүөһүтүгэр селекционнай үлэни ыытыаҕа. Ураты боруоданы тыыннаах тутар уонна дэлэтэр сыалтан, 2024 сылга диэри 3000 төбөҕө, ол иһигэр 1000 ыанар ынахха, тириэрдэр сорук турар», — диэтэ тустаах миниистир Александр Атласов социальнай ситимнэринэн быһа эфир кэмигэр.
Миниистир эппитинэн, племенной үлэ биир соругунан буоһатар оҕустары саҥардыы буолар. Ол сыалтан сылын аайы араас статустаах хаһаайыстыбалар ыккардыларыгар атастаһыы барар.
Бэлиэтээн эттэххэ, саха сүөһүтүн төбөтүн элбэтии регион тыа хаһаайыстыбатыгар сүрүн соруга буолар. 2019 сыллаахха өрөспүүбүлүкэҕэ «Саха сүөһүтэ» тэрилтэ арыллыбыта. Быйыл сыл саҥатыгар аҕыс отделениеҕа 967 төбө баар, бу региоҥҥа баар ахсаан 40% ылар. Түөрт сылга тэрилтэҕэ төбө ахсаана икки төгүл эбилиннэ (195,4%), ол иһигэр ыанар ынаҕа 1,7 төгүл (164,6%), суруйда регион сүрүн пресс-сулууспата.
Хаартыска: интернеттэн
