Кэлэр өрөбүлгэ, олунньу 14-15 күннэригэр Нам сэлиэнньэтигэр «Эҥсиэли хапсаҕайа» өрөспүүбүлүкэтээҕи турнир ыытыллыаҕа. Муҥутуур кыайыылаахтар спонсордартан сүүс тыһыынча солкуобайы тутуохтара, диэн ЯСИА иһитиннэрэр.
Николай Румянцев бирииһигэр А категориялаах үгэс буолбут турнир сыл аайы өрөспүүбүлүкэ күүстээх хапсаҕайдьыттарын түмэр.
«Өрөбүллэргэ араас улуустартан 200-чэ кыттааччыны күүтэбит. Ыйааһыҥҥа турнир кыайыылаахтара 20-лии тыһ солк, үрүҥ көмүс призердара 15-тии тыһ солк, боруонса призердар 10-нуу тыһ солк ылыахтара. Маны таһынан, кыттааччылар эр дьон ортотугар 85 кг диэри уонна онтон үөһэ категорияларга муҥутуур кыайыы иһин киирсиэхтэрэ. Икки күүстээх 100-түү тыһ солк ылыахтара», — диэн Саха сирин хапсаҕайга Федерациятын толорооччу дириэктэрэ Андриан Захаров ЯСИА кэпсээтэ.
Тустууга эр дьон 57, 65, 75, 85, 95 уонна 95 киилэттэн үөһэ ыйааһыннарга киириэхтэрэ. Ону тэҥэ 40-тан тахса саастаах бэтэрээн эр дьон кыттыахтара — 60, 70, 80, 90 уонна 90-тан үөһэ ыйааһыҥҥа.
This post was published on 13.02.2026 17:19 17:19