Нам улууһун полициятыгар олохтоох дьахтары түөкүннээһин туһунан үҥсүү киирдэ. Дьахтар Интернет ситимигэр харчылаһаары, «aelita_stepanova777» диэн «Instagram социальнай ситим туһанааччытын кытары суруйсубутун кэпсээтэ. Суруйсуу сахалыы тылынан барбыт диэн, өрөспүүбүлүкэ ИДьМ пресс-сулууспата биллэрдэ.
Салгыы албыннаппыт дьахтар сэһэргэһээччитин инструкциятын барытын толорбут. Массыанньык дьахтар киниэхэ хайа эрэ сайтка сыылка ыыппыт, уонна олохтоох дьахтарга баан каартатын нүөмэрин киллэрэргэ сүбэлээбит. Дьахтар тутатына усулуобуйаны барытын толорбут, уонна туох баар каартатын сыыппаратын биллибэт сайтка бэйэтэ киллэрбит. Онуоха бастакы усунуос 20 тыһыынча солкуобайга тэҥнэспит.
Массыанньык бу дьахтары бааҥҥа эрийэн харчы көһөрүүтүн бэйэтэ оҥорбутун бигэргэтэригэр көрдөспүт уонна укпут харчыта дьахтарга тута төннөрүн эрэннэрбит. «aelita_stepanova777» бу көһөрүү кэннэ тута сүтэн хаалбыт, төлөпүөнүн араарбыт. Бу курдук албыннааһын түмүгэр хоромньулаах дьахтартан 97 тыһыынчаттан тахса солкуобайы уорбуттар.
