Көҥүл уонна греко-римскэй тустуу көрүҥнэригэр 18 диэри саастаах уолаттарга, кыргыттарга Уһук Илин уокурукка бастыыр иһин күрэхтэһиилэр ыытылыннылар. Благовещенскай куоракка – көҥүл тустуу, Владивостокка – греко-римскэй. Көҥүл тустууга Нам улууһун спортсмен оҕолоро ситиһиилээхтик кытыннылар.
Благовещенскай куоракка Саха сирин тустууктара барыта 28 (6 кыһыл, 9 үрүҥ көмүстэр, 13 боруонса) мэтээли ылары ситистилэр. Владивосток куоракка ыытыллыбыт греко-римскэй тустууга өрөспүүбүлүкэ сүүмэрдэммит хамаандата үс мэтээли уонна Россияҕа бастыыр иһин күрэхтэһиигэ кыттар биэс путевканы ылан биир дойдулаахтарын үөртэ. Салгыы, Россияҕа бастыыр иһин күрэхтэһии кулун тутар ыйга Омскай куоракка ыытыллара былааннанар.
Греко-римскэй тустууга уопсайа 80 спортсмен (Саха сирэ, Сахалин, Амурскай уобалас, Забайкалье, Хабаровскай, Приморскай кыраайдар, Еврейскай, Чукотскай автономнай уобаластар) кыттыыны ылбытын, Нам улууһун сүрүн тренерэ Кузьма Сивцев этэр. Бэлиэтээн эттэххэ, Саха сиригэр Владивосток куорат көбүөрүттэн кыһыл көмүс мэтээли аҕалбыт Пинигин Артур (Хатырык нэһилиэгэ) бастакы тренерэ – Илья Обутов.
Көҥүл тустууга Нам улууһун спортсмен оҕолоро ситиһиилээхтик кытыннылар. Кыргыттарга: Спиридонова Сайаана (61 кг, 1 миэстэ, Үөдэй нэһилиэгэ); Куличкина Надежда (43 кг, 2 миэстэ, Граф биэрэгэ). Уолаттарга: Охлопков Николай (55 кг, 2 миэстэ, Үөдэй); Захаров Николай (51 кг, 3 миэстэ, Хатыҥ-Арыы); Матвеев Игорь (60 кг, 3 миэстэ, Нам сэлиэнньэтэ). Ону тэҥэ, Саха сирин хамаандатыттан Кириллин Айсен (Хамаҕатта) уонна Охлопков Айысхан (Аппааны) тахсан туһуннулар.
Санатан эттэххэ, спорт эйгэтигэр 2021 сыл саҕаланыыта эр дьоҥҥо Уһук Илин чемпионатыгар хамаанданы сүүмэрдиир сабыылаах хапсыһыы буолбута. Дьокуускайга ыытыллыбыт көҥүл тустууга Кузьма Сивцев 97 кг ыйааһыҥҥа бастаан, улууһугар маҥнайгы кыайыыны аҕалбыта.
«Көҥүл тустуу көрүҥэр миэстэлэспит оҕолор Россияҕа бастыыр иһин күрэхтэһиигэ кыттарга быраап ыллылар уонна РФ спордун маастарыгар кандидат нуорматын толордулар. Оҕолорбут ситиһиилэнэллэригэр дьарыктыыр тренердарбыт өҥөлөрө улахан: Анжела Парникова, Владимир Копырин, Кирилл Павлов, Вячеслав Стрекаловскай, Илья Обутов.
Күрэхтэһиилэр, дьарыктар, сбордар сэмээр саҕаланан эрэллэр. Ол эрээри, хас биирдии ыытыллар күрэхтэһиилэргэ спортсментан СOVID-19 (хас да күрэхтэһиигэ кыттар буоллаҕына, барытыгар тус-туспа) анаалыс ылар буоллулар. Бииринэн үчүгэй, биир өттүнэн киһи эрэ барыта уйуммат сыаната буоларын эмиэ билиниэххэ наада. Манан сиэттэрэн, кыттыан баҕалаах, эрчиллиилээх оҕолорбут тэрээһиннэртэн көрдөрөн туран маппыттара эмиэ баар суол”, – диэн кэпсиир Кузьма Афанасьевич.
