Күн-түүн элбэх өрүттээх киин (МФЦ) тутуута харахха быраҕыллар гына уларыйара Хатырыктары үөрдэр. Дьэ, онон тутуу хаамыыта төһө хачча буолбутун билээри прораб Иннокентий Местниковтан ыйыталастым. Бу тутууга Ил Дархан муус устар 26 күнүгэр 2022 сылга бастакы сыбаайаны түһэрсибитэ.
Иннокентий Петрович билиҥҥи туругунан эбийиэккэ 35 киһи үлэлии сылдьарын кэпсиир. Олортон олохтоохтортон 2 киһи бастайааннай үлэҕэ киирэн үлэлии сылдьаллар. Эверстов Дмитрий диэн бэртээхэй үлэһит киһи диэн хайгыыр. Туох да этиттэриитэ суох, барытын бары оҥоро сылдьар диэн астыммытын биллэрдэ. Винокуров Сергей эмиэ тутаах үлэһит үһү. Онон олохтоохтор кыра да буоллар бу улахан тутууга сэмэй кылааттарын киллэрэллэрэ үөрдэр.
Тутуу хаамыытыгар улахан хаалыы суох эбит. Иһинээҕи уота-күөһэ оҥоһулла сылдьар. Сотору кэминэн ититэр ситими оҥоро кэлиэхтээхтэр. Прораб балаҕан ыйын 15 гэр котельнайга холбоммут киһи диэн баҕа санаатын этэр. Тас өттүн бүрүйэр плиталар кэлэ сыталлар, сотору кэминэн баараҕай тутуубут дьиҥнээх киэбин-таһаатын ылыа турдаҕа. Ис өттүн көрдөххө, уҥуор олорор киһи улар саҕа буолан көстөр диэбиттии спортсаала улахана сүрдээх. Муостатыгар мас оннугар анал эрэһиинэ тэлгэтиллэр буолбут. Онно холоотоххо концерт көрөр саалабыт кыра курдук эрээри проекка эппиэттиир буолуохтаах. Тутуубут үгүс элбэх хостооҕо сөхтөрдө, санузелы аахсыбатахха 60 ча хос баар үһү. Өссө лифт үлэлиэхтээх.
Тутуу иһэ тигинээн олорор, муоста тэлгээһинин, истиэнэ штукатуркатын Таджикистан уолаттара кыайа-хото туталлар эбит. Аны кыһын үлэҕэ киириэхтээх элбэх өрүттээх кииммит (МФЦ) бүгүн күннээххэ итинник.
Эрчим Баһыл, Хатырык
