1 Алтынньы 01.10
  • -1°
  • $ 55,3
  • 52,74

Нам Хамаҕаттатыгар «Эрчим» спорт саалаҕа футбол хонуута баар буолуоҕа

Хамаҕаттатааҕы Н.П. Габышев аатынан «Эрчим» спорт саалаҕа капитальнай ремонт бүтэрэ аҕыйах хонук хаалла. Ол курдук, санаа хоту барбыт үлэ хаамыыта балаҕан ыйын 1 күнүгэр түмүктэниэхтээҕин директор Афанасий Назаров бигэргэтэр. Хаалбыт күннэргэ Григорий Кобяков салайааччылаах ООО «Лигран» тэрилтэ үлэһиттэрэ лаампа иилиэхтэрэ, муостаны бүрүйүөхтэрэ. Санаттахха, ыам ыйын саҕаланыыта Н.П. Габышев аатынан «Эрчим» спорт саалаҕа «2020-2025 сылларга тыа сирдэрин сайыннарыы» государственнай программанан капитальнай ремонт саҕаламмыта.

Улуус үрдүнэн Хамаҕаттаҕа толору хааччыллыылаах соҕотох тренажернай саала баар эбит буоллаҕына, бу сырыыга футболлуурга сөптөөх анал поле тэлгэниэҕэ. Эбэн эттэххэ, билиҥҥитэ «Эрчим» спорт саалаҕа олохтонон үлэлии олорор улуустааҕы «Олимпик» спортивнай оскуолаҕа футбол көрүҥэр тренер кэлэрэ былааҥҥа турар. Ити курдук, улуус, республика таһымнаах футбол күрэхтэһиилэрэ Хамаҕаттаҕа буолалларын таайбыттааҕар сэрэйбит көнө.

«Билэрбит курдук, Хамаҕаттаҕа саҥа тутуулар олоххо киирдилэр. Ол курдук, саҥа тутуллубут дьыссааттан, оскуолаттан талааннары сүүмэрдээн, тренердэргэ сөптөөх дьарыкка сырытыннаран, оҕолорбутун спорт үрдүкү кэрдииһигэр таһаарар сыаллаах-соруктаах үлэлиэхтээхпит диэн баҕа санаабын этэбин.

Нэһилиэкпитигэр холобур буолар хамсааһыммыт — баҕалаахтары хапсаҕай дьарыгар ыҥырыы. Билигин Парников Николай Алексеевич бэлэмниир бөлөҕө сайынын айылҕаҕа сырытта, дьарыктанна», — диир Афанасий Афанасьевич.

Спорт дьиэтигэр директор Афанасий буулдьанан ытыы көрүҥүн арыйан үлэлэтиэн баҕарарын биллэрэр. Ону таһынан, республикаҕа киэҥ биһирэбили ылааччы көрүҥнэртэн биирдэстэригэр, волейболга оҕолору сыһыарыы. Футбол, волейбол элбэх дьону түмэ тардар көрүҥнэр буолаллар.

Харысхан Попов
Энсиэли

Следите за самым важным и интересным в Telegram-канале и WhatsApp-группе ЯСИА
0
0
Тутаах тыллар