Нам улууһун Арбын нэһилиэгэр уу таһыма бытааннык үрдүү турар.Билиҥҥи туругунан, барыта 24 дьиэ ууга барда. Ол туһунан халаан уутун уонна ойууру баһаартан харыстааһын оперативнай штабын брифинигэр өрөспүүбүлүкэ экологияҕа, айылҕаны туһаныыга уонна ойуур хаһаайыстыбатын миниистрин солбуйааччы Андрей Коноплев кэпсээтэ, диэн СИА иһитиннэрэр.
«Халаан уута штатнай режиминэн бара турар. Сууккаҕа уу критическэй таһыма Нам оройуонун Арбын нэһилиэгэр бэлиэтэммит. Барыта 24 дьиэ ууга барда. Өлүөнэ уонна Алдан өрүстэригэр уу иккис долгуна үөскээн нэһилиэнньэлэр тастарыгар уу бытааннык үрдээн иһэр. Сарсыарда 6 чааска уу таһыма 913 см тиийдэ«, — диэн Андрей Коноплев иһитиннэрдэ.
Нэһилиэк дьаһалтата наадалаах дьаһаллары барытын ылынна. 7 киһини ол иһигэр 4 оҕону аймахтарыгар көһөрдүлэр. Билиҥҥитэ быстах олорор пууҥҥа ким да киирэ илик.
Халаан содулун туоратыыга 25 киһи уонна 4 тиэхиникэ үлэҕэ тардылынна.
This post was published on 06.06.2022 12:01 12:01