Алтынньы ый бүтүүтэ Нам оройуонун Аппаанатыгар саҥа модульнай балыыһа үлэҕэ киириэҕэ. Эбийиэк «Доруобуйа харыстабыла» национальнай бырайыак бастакы звеноларын саҥардыы бырагырааматын чэрчитинэн тутулунна. Бу туһунан Нам киин балыыһатын кылаабынай бырааһа Ариан Сергеев иһитиннэрдэ.
«Саҥа дьиэ 130 кэриҥэ квадратнай миэтэрэ иэннээх уонна бары ирдэбилгэ эппиэттиир. Амбулаторияҕа терапевт, педиатр уонна фельдшер кабинеттара бааллар. Нэһилиэнньэ күннээҕи кэмҥэ стационарнай көмөнү ыларыгар эмиэ туспа палаталаах буолуоҕа. Итини таһынан эмтиир уонна процедурнай кабинеттар, эми-тому харайар хос уонна да атын технологическай кабинеттар көрүлүннүлэр», — диэн кэпсээтэ Ариан Сергеев.
This post was published on 11.10.2022 16:03 16:03