Дьокуускайга В.А. Босиков аатынан музыка үрдүкү оскуолатын саҥа үөрэнэр корпуһа тутуллуоҕа. 240 үөрэнээччигэ ананар, интерната 150 миэстэлээх.
Барыллаан дааннайынан, тутуу 2024 сылга саҕаланыахтаах. Ол туһунан Ил Дархан Айсен Николаев президент көмөлөһөөччүтэ Максим Орешкины кытта үөрэх тэрилтэтигэр оробуочай сырыыларын кэмигэр эттэ.
Кинилэр административнай, үөрэнэр, олорор пуонданы көрдүлэр, оскуола материальнай-техническай баазатын билистилэр, суруйар СИА.
«Бүгүн биһиги Дьокуускай куорат маастар-былаанын оҥорууга үлэлээтибит. Киин куорат култууратын сайдыытыгар биир сүрүн чааһынан музыка үрдүкү оскуолатын саҥа дьиэтин тутуу буолар. Саҥа эбийиэк тутулуннаҕына оҕолор бэйэлэрин талааннарын өссө үчүгэй усулуобуйаҕа чочуйуохтара, уонна салгыы өрөспүүбүлүкэлэрин аан дойдуга аатырдыахтара», — диэтэ Айсен Николаев.
Сиһилии https://ysia.ru/novoe-zdanie-vysshej-shkoly-muzyki-budet-postroeno-v-yakutii/
