Маастар-былаан быһыытынан, 2032 сылга Дьокуускай 400 сыллаах үбүлүөйүн бэлиэтииригэр бэлэмнэнии үлэ ыытыллар. Бу бэлиэ кирбиини Туймаада туналыйар туоната интеллектуальнай баайдаах, үрдүк дохуоттаах, ирбэт тоҥ үрдүгэр бастыҥ куорат быһыытынан көрсүөхтээх, ол туһунан Саха парламент саайт суруйда.
Былырыын муус устарга бэрэсидьиэн Владимир Путин Дьокуускай 400 сыллаах үбүлүөйүгэр бэлэмнэнэр үлэни саҕалыыр туһунан ыйааҕы таһаарбыта.
Быйыл Дьокуускайга маастар-былаан чэрчитинэн, үс эбийиэги тутуохтара. Куорат киинигэр Ленин проспегар 1 №-дээх оскуоланы, Муусука үрдүкү оскуолатын саҥа дьиэтин тутан бүтэриэхтэрэ, ону таһынан, «Спортивнай» түөлбэҕэ хаарбах дьиэлэртэн дьону көһөрөн, саҥа тутууну саҕалыыр сири бэлэмниэхтэрэ.
Владимир Путин 2024 с. сайын кэлэ сылдьан, Муусука үрдүкү оскуолатын көрбүтэ уонна саҥа куорпуһу тутан бүтэрэргэ, муусука үнүстүрүмүөннэрин атыылаһарга федеральнай бүддьүөттэн 2024-2026 сс. харчы көрөргө сорудахтаабыта. Онон 240 устудьуон үөрэнэр 9,5 тыһ. кв.м. иэннээх саҥа, үс этээстээх үөрэнэр куорпус, 150 миэстэлээх интэринээт тутуллуохтара. Маны таһынан, улахан кэнсиэртиир саала, бибилэтиэкэ, тыаһы-ууһу устар устуудьуйа, фонотека хоһо, успуордунан дьарыктанар саала баар буолуоҕа.
