Ирина Васильевна Черкашина «Сүрэҕим сылааһын оҕолорго аныыбын» күрэх туһунан СИА-ҕа кэпсээтэ. Дьаһалы үөрэххэ уонна наукаҕа министиэристибэ иһинэн Саха сирин Кэнчээри ыччата өрөспүүбүлүкэтээҕи тирэх киин тэрийэн ыытар.
1998 сыллаахха эбии үөрэхтээһин педагогтарын оҕону иитиигэ оруолларын таһымын үрдэтэр сыаллаах «Сердце отдаю детям» диэн Бүтүн Россиятааҕы бастакы куонкурус ыытыллыбыта. Ити кэмтэн ыла куонкурус үгэс быһыытынан сылын аайы ыытыллар. Бу сыллар тухары эбии үөрэхтээһин педагогтара күрэҕи өрөспүүбүлүкэҕэ эрэ буолбакка, Бүтүн Россиятааҕы куонкурус финалыгар эмиэ ситиһиилээхтик кыттан кэллилэр. Бу куонкурус аан маҥнай ыытылларыгар Саха сириттэн ол сыл бастыҥнартан бастыҥ эбии үөрэхтээһин педагога Николай Николаевич Терютин буолар, кини Ростов на Дону куоракка ситиһиилээхтик кыттыбыта.
Фото: Туйаара Прокопьева
Ирина Черкашина кэпсииринэн, сылын аайы ыытыллар күрэх эбии үөрэхтээһин педагогтарын үлэтин киэҥ араҥаҕа билиһиннэрэр, уопут атастаһар, салгыы сайдарга, үүнэргэ анал эйгэни тэрийэр сыаллаах-соруктаах ыытыллар.
— 2023 сыл ураты суолталаах. Ол курдук 2023 сылы Педагогтар (ол иһигэр аҕа-сүбэһиттэр) анал туруктарын билинэр, үлэлэрин-хамнастарын үрдэтэргэ туһулуур сыаллаах «Педагог уонна аҕа сүбэһит сылынан» дойду Бэрэсидьиэнэ биллэрбитэ, Саха Өрөспүүбүлүкэтигэр “Үлэ сылынан” биллэрилиннэ уонна «Эбии үөрэхтээһин быйыл 105 сыла». Онон быйыл күрэххэ үрдүк таһымнааах, бэлэмнээх кыттаачылары күүтэбит.
Күрэх балаһыанньатыгар улахан уларыйыы суох.
Бу күннэргэ күрэх улуустар таhымнарыгар буола турар, кыайыылаахтар өрөспүүбүлүкэтээҕи түһүмэххэ кытта кэлиэхтэрэ, муус устар 3-4 күннэригэр Оҕо дыбарыаһыгар ыытыллаары турар. Бу ый 18 күнүгэр дылы сайаапкалары эбии үөрэхтээһин араас тэрилтэлэриттэн күүтэбит.
Куонкуурс 9 номинациянан арахсан ыытыллар: техническай, художественнай, естественно-научнай, туристко-краеведческай, физкультурно-спортивнай, социально-гуманитарнай уонна бу кэнники сылларга саҥа киирбит номинациялар «Эбии үөрэхтээһин профессиональнай дебюта», «Эбии үөрэхтээһин педагог-наставнига» уонна «Доруобуйаларыгар хааччахтаах уонна инбэлиит оҕолору кытта үлэлэһэр педагог», — диэн кэпсээтэ кини.
Өрөспүүбүлүкэтээҕи түһүмэх икки турдаах. Бастаан бары кыттааччылар маастар-кылаас ыытыахтара, хамаанданан сорудах толоруута буолуоҕа. 9 кыайыылаах хаалан, иккис турга кыттыаҕа: педагогикаҕа куонкурус, манна педагогтар тест ааһаллар уонна педагогическай ситуацияларга эппиэттиэхтэрэ. Салгыы «Высшая лига», Саха Өрөспүүбүлүкэтин Үөрэххэ уонна наукаҕа министирин кытта педагогическай дискуссия ыытыллар.
Күрэх түмүгүнэн муҥутуур кыайыылаах Россия таһымыгар кыттар быраабы ылыаҕа.
Ааптар: Туйаара Прокопьева
