«Муус устар» бэстибээлгэ үгэс быһыытынан «Лучшие молодёжные районы» диэн анал номинация туттарыллар. Арктика оройуоттарыгар Булуҥ бастаата, оттон өрөспүүбүлүкэ бастыҥ ыччаттаах улууһунан Горнай ааттанна.
Ил Дархан Айсен Николаев бэлиэтээбитинэн, Саха сирин ыччатыгар «Муус устар» бэстибээл куонкурустара улахан интэриэһи үөскэтэр. Баһылык Булуҥ улууһугар 1 мөл солк туттарда. Бу хамаанда былырыыҥҥы тэрээһиҥҥэ эмиэ бастаабыта. «Куонкурус киирсиитэ сытыы, Арктика улуустарыгар инники тахсыыга биир баал улахан оруолу оонньоото. Сертификаты ис дууһабыттан туттарабын кыайыылаахтарга», — диэтэ кини.
Хаартыска: ЯСИА саайта
Бэстибээл сүрүн кыайыылааҕынан горнайдар ааттаннылар. Ил Дархан иһитиннэрбитинэн, икки баалынан хоттулар. Кинилэр бириистэрэ — 2 мөл солк.
«Муус устар» ыччат бэстибээлэ Саха сиригэр 2021 сылтан ыытыллар. Быйыл өрөспүүбүлүкэ бары улуустарыттан икки тыһыынча кэриҥэ эдэр дьон кытынна. Барыта 14 хайысханан барар тэрээһин регион ыччата араас эйгэлэргэ талаанын киэҥ эйгэҕэ таһаарар.
This post was published on 19.02.2024 09:33 09:33