«Сыл аайы бырагыраамаҕа саҥаны уонна уларыйыылары киллэрэбит, саҥа хайысхалар эбиллэллэр, министиэристибэлэр, тэрилтэлэр кыттыһаллар. Быйыл 12 трек уонна 23 куонкурус буолар, олортон уона — саҥа. Саҥаларга — стендап-комиктар куонкурустара, Иннокентий Тарбахов 80 сааһыгар анаммыт «Секреты шефа» култуура киирсиитэ, эдэр архитектордар тургутуһуулара. Өрөспүүбүлүкэ нэһилиэнньэлээх пууннарын тупсарыыга саҥа бырайыактары күүтэбит», — суруналыыстарга ыччат миниистирин бастакы солбуйааччыта Надежда Мохначевская эттэ.
Түмүктүүр шоуну ыытыыга улахан хамаанда үлэлиир. Састаапка техническай исписэлиистэр, режиссердар, хореографтар, сценаристар уонна худуоһунньуктар бааллар.
«Быйыл киэбин уларытабыт. Сюжеттаах уонна чопчу идеялаах толору көрдөрүү буолуоҕа. Патриотизмҥа уонна Кыайыы 80 сылыгар анаммыт блок баар. Анал эффектэр, уот-күөс, экраннар. Худуоһунньук Михаил Егоров 40 миэтэрэлээх сцена оҥордо, араас таһымнаах, уоттаах-күөстээх улахан экраннаах. Репетиция сарсын саҕаланыаҕа», — диэтэ режиссер Михаил Степанов.
Ыҥырыылаах ыалдьыттар уонна хедлайнердар ортолоругар — бокска икки төгүллээх олимпийскай чөмпүйүөн Олег Саитов, биллиилээх пранкердар Алексей Столяров (Лексус) уонна Владимир Краснов (Вован) бааллар. Бэстибээлгэ байыаннай кэрэспэдьиэн Семен Пегов кыттыаҕа.
Пуорум чэрчитинэн, Кыайыы 80, анал байыаннай дьайыы билиҥҥи балаһыанньатынан, биллэр бэйиэттэр, киинэ режиссердара уонна да атын медийнай дьон кыттыыны ылыахтара.
Конгресс-киин салайааччыта Максим Сыромятников бэлиэтээбитинэн, бэстибээл сылын аайы сайдар, саҥа куонкурустар уона хайысхалар эбиллэллэр. «Быйыл патриотическай тематикаҕа ананар, СВО кыттыылаахтарын өйүүргэ анаммыт пуорум ыытыллыаҕа. Бырагыраамаҕа аан бастакытын «Чистая Арктика» федеральнайдааҕы бырайыак киирдэ. Бу олус суолталаах экологическай көҕүлээһин Россия Арктикатын сирин-уотун ыраастааһыҥҥа», — диэтэ кини.
Быйыл бэстибээлгэ 25 000 тахса киһи кыттара былааннанар, сүүмэрдиир түһүмэхтэри киллэрэн туран. Түмүктүүр шоу 4000 кэриҥэ көрөөччүнү түмүөҕэ.
This post was published on 11.03.2025 16:05 16:05