25 Балаҕан ыйа 25.09
  • $ 58,1
  • 56,48

Муома улууһун Хонуутугар бастакы от турда

Хонууга кэтэх хаһаайыстыбалаах ыал ахсааннаах. Кырдьыга, сүөһү ииттэр, хотону тутар улахан үлэлээх, сыраны-сылбаны, үгүс бириэмэни эрэйэр. Ону таһынан, чугаһынан оттуур сир көстөрө эмиэ күчүмэҕэйдэрдээх. Ол эрээри наар кыаллыбат эрэ өттүн санаатахха, ханнык да үлэ тахсыбата биллэр суол. Ыарахаттары бары саба түбэһэн бииргэ туораан, үлэни өрө туппут ыаллар биһиэхэ да бааллар. Оҕолор, сиэннэр үрүҥ аһы аһаан чөл, чэгиэн буола улааталлара, куйааһы-бырдаҕы аахсыбакка үлэҕэ уһуйуллаллара бары өттүнэн туһалаах, кэскиллээх. Ону бэркэ өйдөөн элбэх оҕолоох Лена, Леонид Черёмкиннар өбүгэлэрбит дьарыктарынан — ынах сүөһү иитиитинэн дьарыктаммыттара син ыраатта.

Черёмкиннар бу ааспыт нэдиэлэҕэ ходуһаларыгар киирэн, номнуо биир оту лөглөтөн туруораллар. Ыал аҕата Леонид Петрович: «Быйыл от үүнүүтэ мөлтөх. Урукку сылларга оттуур ходуһабытыгар Быллаардаахха икки от тахсар буолара, быйыл от чараас буолан биир оту туруордубут. Ол эрэн санаабытын түһэрбэппит, халлаан турдар эрэ күөх оту сомсор санаалаахпыт» , — диир. Аҕаларыгар оҕолоро, күтүөт, сиэннэр буолан көмөлөһөллөр. Ийэлэрэ Лена Афанасьевна дьиэҕэ хаалан, отчуттарыгар ыһык бэлэмнээн түбүгүрэр. Күөх сайыҥҥа үрүҥ ас арааһа — күөрчэҕэ, сүөгэйэ, суората дэлэй! Киэһэ ахсын күүстээх үлэҕэ сылдьар дьоно ийэлэрин суоратын сиэн сылааларын таһаараллар.

Өбүгэлэрбит бэргэн этиилэринии, «Сайыҥҥы биир хонук дьылы аһатар». Онон куйаас күннэри баттаһа, отчуттар, туттуммахтаан хаалыҥ.

Следите за самым важным и интересным в Telegram-канале и WhatsApp-группе ЯСИА
0
0