Сылы эргиччи суол суоҕа, кадр тиийбэтэ уонна тыа хаһаайыстыбатыгар баар кыһалҕалар Муома улууһун олохтоохторун долгуталлар. Дьон таба уонна сылгы ахсааныгар алдьархайы үөскэтэр бөрөнү бултааһыҥҥа үбүлээһин улаатарыгар этиннилэр, суруйар СИА.
Муома улууһун олохтоохторугар бырабыыталыстыба отчуотун култуура миниистирэ Юрий Куприянов уонна үлэ миниистирин бастакы солбуйааччыта Иван Алексеев ыыттылар.
Иван Алексеев бэлиэтээбитинэн, сөптөөх кэпсэтии буолла, 41 ыйытыы киирдэ. Отчуот 2,5 чаас барда.
Муомалар улуус сиригэр-уотугар быыһыыр сулууспа филиала баара буоллар диэн этии киллэрдилэр. Биэрэги бөҕөргөтөр үлэлэр ыытыллыылара экономика эбийиэктэрин уонна олорор дьиэлэри харыстааһыҥҥа сөптөөх дьаһал буолуохтааҕын бэлиэтээтилэр.
Тыа хаһаайыстыбатын эйгэтин бэрэстэбиитэллэрэ таба уонна сылгы ахсааныгар алдьархайы үөскэтэр бөрөнү бултааһыҥҥа үбүлээһини үрдэтэр наадалааҕын биллэрдилэр.
Итиэннэ олохтоох оҥорон таһаарыыны сайыннарыыга идэһэни астыыр анал пууннар нэһилиэктэргэ тэриллэллэрэ буоллар диэтилэр.
