Саха Сиригэр “Олоҥхолоох айаан: НОО!» тэрээһин Кэбээйи улууһун Кэбээйи сэлиэнньэтигэр уонна Горнай улууһун Бэс-Күөл сэлиэнньэтигэр ыытылынна.
Ураты бэстибээл Саха сирин икки культурнай бэлиэтин холбоото: олоҥхо героическай эпоһа уонна үгэс буолбут – муҥха. Биирдиилээн толоруу номинациятыгар 15 эдэр олоҥхо толорооччута кытынна, онтон 11-рэ Арктикатааҕы культура уонна искусство судаарыстыбаннай институтун устудьуоннара уонна выпускниктара буолаллар.
«Муҥха олоҥхото» бэстибээл финалыгар үс олоҥхоһут таҕыста. Кыайыылааҕынан Хаҥалас оройуонун фольклоругар исписэлииһэ уонна АГИКИ-ны бүтэрбит Прасковья Прокопьева билинилиннэ. «Бастыҥ толорооччу» номинацияҕа Станислав Иванов, «Ырыалаах толорооччу» номинацияҕа Марфа Аммосова (иккиэн Мэҥэ Хаҥалас улууһуттан) тигистилэр.
Олоҥхо эпоһын эдэр толорооччуларын десанын тэрийээччилэринэн Арктикатааҕы культура уонна искусство судаарыстыбаннай института (АГИКИ), СӨ Национальнай бибилэтиэкэтэ уонна «Олоҥхо Ассоциацията» ЯРОО буоллулар. 2022 сылга саҕаламмыт бырайыак өрөспүүбүлүкэ араас муннуктарыгар ыччакка олоҥхону тарҕатар албан ааттаах үгэһин салҕыыр.
Тэрээһин чэрчитинэн кыттааччылар тыл этиилэрин идэтийбит видео-уһулуута ыытылынна. Матырыйааллар «Олоҥхо» холбоһуктаах порталын хаҥатыахтара, эпическэй нэһилиэстибэ ураты холобурдарын харыстааһыны уонна киэҥник тэнитиини хааччыйыахтара.
Горнай улууһун Бэс Күөл сэлиэнньэтигэр В.Д. Лонгинов аатынан Атамай оскуолатын оҕолорун кытта көрсүһүү буолла. Десант кыттыылаахтара АГИКИ-га уонна А.Д. Макарова аатынан Дьокуускайдааҕы култуура уонна искусство колледжыгар култуура эйгэтигэр үөрэҕи ылар кыахтарын кэпсээтилэр. Көрсүһүү түмүгэр АГИКИ-ны бүтэрбит, СӨ култууратын туйгуна Виталий Никифоров «Дьулуруйар Ньургун Боотур» олоҥхоттон оскуола оҕолоругар быһа тардан толордо. Ону сэргэ институт устудьуоннара уонна выпускниктара ыччакка олоҥхо толоруу искусствотыгар маастар-кылаас ыыттылар.
This post was published on 19.11.2025 13:40 13:40