Оскуола оҕолоругар уонна устудьуоннарга аналлаах «Моя профессия — ИТ» бүтүн Россиятааҕы куонкуруһу Х Илиҥҥи экономическай форумҥа билиһиннэрдилэр. Бырайыак Саха сиригэр оҥоһуллан олоххо киирбитэ, онтон 2023 сыллаахха федеральнай таһымҥа тахсыбыта. Регион тэрийэр уопутун туһунан бырабыыталыстыба бэрэссэдээтэлин солбуйааччы Анатолий Семенов «Үөрэнэргэ анаан оонньуубут: ыччаты креативнай индустрияларга иитии уонна үөрэтии саҥа форматтара» сессияҕа кэпсээтэ.
«Быйыл биһиги куонкуруспут үбүлүөйдээх онус сылынан буолар. Биһиги кыра көҕүлээһиммит дойду 30 регионуттан 40 тыһыынча кыттааччыны хабан, киэҥ далааһыннаах бүтүн Россиятааҕы хамсааһыҥҥа кубулуйбутуттан киэн туттабыт. Быйыл Россия президенэ Владимир Путин сорудаҕынан куонкурус «Россия — кыах дойдута» АНО-тан өйөбүл ылла”, — диэтэ Анатолий Семенов тыл этиитигэр.
Вице-премьер куонкуруска кыттыы оскуола оҕолоругар тутаах аныгы компетенциялары ыларга уонна кэскиллээх идэни баһылыырга көмөлөһөрүн бэлиэтээтэ. Устудьуоннарга бу салааҕа киирии уонна потенциальнай үлэ биэрээччилэри кытта сибээс олохтуур кыахтаах. Ону таһынан кыайыылаахтар үрдүк үөрэххэ сыаллаах путевканы уонна БКЭ эбии бааллары ылыахтарын сөп.
Спикердэр ортолоругар РФ наукаҕа уонна үрдүк үөрэхтээһиҥҥэ миниистири солбуйааччы Ольга Петрова уонна “Амик” телевидениенэн айар түмсүү генеральнай дириэктэрэ Александр Масляков бааллар. Сессия кыттыылаахтара эдэр көлүөнэ аныгы оонньуулар киэпсэрин туһатын туһунан кэпсэттилэр.
«Сессия олус көдьүүстээхтик ааста. Ыччат айар, коммуникативнай уонна лидерскай компетенциянан бэйэтин кыаҕын олоххо киллэрэригэр көмөлөһөр киэптэри сайыннарыыны дьүүллэстибит. Кинилэр саҥа көлүөнэҕэ патриотизмы уонна гражданскай эппиэтинэһи үөскэтиигэ суолталарыгар эмиэ ураты болҕомтону уурдубут», – диэн Саха сирин вице-премьерэ кэпсээтэ.
This post was published on 04.09.2025 16:12 16:12