Аҕа дойду улуу сэриитигэр Кыайыы 77 сылыгар анаммыт параад Москва куоракка Кыһыл болуоссакка бүгүн, ыам ыйын 9 күнүгэр, Саха сирин бириэмэтинэн 16.00 чааска буолар. Манна Үөһээ Бүлүү улууһун уола кыттар.
Ыам ыйын 9 күнүгэр Москва бириэмэтинэн 10.00 чааска Кыһыл болуоссакка Кыайыы параада саҕаланар. Манна 11 тыһыынча киһи кыттар. Састаапка бастакынан легендарнай Т-34 тахсар — Улуу сэрии бастыҥ тааҥката.
Параадка Саха сириттэн кытталлар. Ол курдук, Савва Яковлев кулун тутар ыйтан олус долгуйан туран, бары кыһамньытын, болҕомтотун ууран бэлэмнэннэ. Кини М.А.Алексеев аатынан өрөспүүбүлүкэтээҕи лиссиэй-интэринээт 9 кылааһын бүтэрээт, салгыы асчыт идэтин баһылаабыта.
Уол билигин Московскай уобалас, Наро-Фоминскай оройуон, Калининец бөһүөлэгэр 23626 нүөмэрдээх мотострелковай дивизиятыгар сулууспатын ааһар.
«Бу параакка түөрт Т-34 тааҥка кыттыаҕа. Биирдэстэригэр биһиги Саввабыт суоппар- механик. Савва Аҕа Дойду сэриитигэр аатырбыт-суолурбут, легендаҕа кубулуйбут Т-34 тааҥканы салайан, Москва куоратын Кыайыы параадыгар кыттар улахан чиэскэ тиксибититтэн, биһиги, үөһээ бүлүүлэр, киэн туттабыт! Маладьыас, Савва!«, — диэн суруйда Валентина Догоюсова, «Үөһээ Бүлүү» хаһыат суруналыыһа.
Хаартыскаҕа: Параад генеральнай репетициятын кэмигэр.
