21 От ыйа 21.07
  • 29°
  • $ 88,02
  • 96,04

Молуода үрэҕэр - тыл күнэ

12:15, 17 февраля 2016
Текст:
Читайте нас на
Яндекс Новости
ЯДВ

Булуҥ Эдьигээн икки ардыгар киэҥ сиринэн тайаан сытар Молуода үрэҕэр, «Анаабыр Алмаастара» АУо «Үөһээ Молуода» аныгы вахтовай бөһүөлэгэ тутуллан, үһүс сылын үлэлиир. Уһун унньуктаах кыһыны туораан, билигин алмаасчыттар сайыҥҥы сезоҥҥа сыыйа бэлэмнэнэллэр. Сууйуллуохтаах буору, кумаҕы, тааһы фабрикалар тастарыгар аҕалан сүөкүүллэр.


Манна үлэлииргэ, сынньанарга туох баар усулуобуйа барыта баар: сотовай сибээс, библиотека, кулууп, баанньык, тренажернай зал.

Ким таһаарыылаахтык үлэлиир ол үчүгэйдик сынньанар. Төһө да ыраах хоту үлэлии сырытталлар, саха дьоно олунньу 13 күнэ – Ийэ Тыл күнэ буоларын умнубаттар. Онно аналлаах ураты тэрээһин ыытылынна.

Библиотекаттан сахалыы кинигэ уларсан, мүнүүтэҕэ ааҕыыыга күрэхтэстилэр. Биир мүнүүтэҕэ 163 тылы ааҕан, Уус Алдантан Семен Рожин бастаата. «Саха тылын, литературатын эн төһө билэҕин?» викторинаҕа киэҥ билиитин көрдөрөн, Сунтаар Маар Күөлүттэн төрүттээх, геолог идэлээх Петр Петров кыайда. Өс хоһооннорун эндэппэккэ билииигэ Мэҥэ уола, теплотехник Илья Шишигин тэҥнээҕин булбата.  Биир буукубаттан ситимнээн, тиэкис толкуйдааһыҥҥа Эдьигээн уола Виктор Митясов уонна Чурапчыттан төрүттээх Егор Климов кэрэхсэбиллээх кэпсээн толкуйдаан, инники күөҥҥэ таҕыстылар.

Дьоро киэһэни сахалыы гитаранан доҕуһуоллатан, сахалыы ылбаҕай ырыанан астааччы идэлээх Владимир Григорьев, итиэннэ «Саҥа ырыа-2011″ сыллааҕы интерактивнай музыкальнай күрэх кыттыылааҕа, Мииринэй улууһун Сүлдьүкээриттэн сылдьар Спиридон Саввинов-Садын киэргэттилэр. Иркутскай уобалаһыттан төрүттээх нуучча уола Николай Соболев саха хомуһун дьүрүһүтэн, мустубут дьон-сэргэ биһирэбилин ылла.

Следите за самым важным и интересным в Telegram-канале и WhatsApp-группе ЯСИА
Тутаах тыллар