Мохсоҕоллооххо 17 саастаах оскуола кыыһыгар холуобунай дьыала тэрийдилэр. Кини кыбартыыратыгар киллэрбит дьахтары охсубут.
Кыыс доҕотторун кытары подъезка сылдьан уу көрдөһөөрү кыбартыыраҕа тоҥсуйбут. Киниэхэ 45 саастаах кыбартыыра хаһаайката ааны аһан, көрүдүөргэ киллэрбит. уонна уу аҕалан биэрбит. Ол эрээри, эмискэ этиһии тахсыбыт, оскуола оҕото дьахтары чааскынан сирэйгэ охсубут.
Ол түмүгэр, кыбартыыра хаһаайката хараҕар улахан эчэйиини ылбыт диэн, регион силиэстийэлиир кэмитиэтэ иһитиннэрэр. Эмсэҕэлээбит дьахтар балыыһаҕа көмө көрдөспүт уонна быраабы араҥаччылыыр уорганнарга сайабылыанньа биэрбит. Силиэстийэ үлэһиттэрэ быһылаан туохтан тахсыбытын олохтууллар, экспертнэй чинчийиилэр ананнылар.
This post was published on 13.03.2023 18:02 18:02