Саҥа эбийиэк 1971 сыллаахха тутуллубут, 2022 сыллаахха хаарбах туруктааҕынан билиниллэн көтүрүллүбүт оскуола дьиэтин оннугар тутулунна. Икки бүтэһик сылга оҕолор араас дьиэлэринэн хайдыһан үөрэнэ сылдьыбыттара.
Ил Дархан Айсен Николаев оскуола арыллыбытынан оҕолору эҕэрдэлээтэ уонна пилота суох авиация систиэмэтин кабинетыгар тэрил ылыналларыгар сертификат туттарда.
«Өр күүтүүлээх эбийиэк. Оҕолор саҥа оскуолаларыгар кыахтарын толору туһанан үөрэнэллэригэр уонна оскуолаларын үтүөнэн эрэ ааттаталларыгар эрэллээхпин. Учууталлар оҕолору үөрэтэллэригэр талааннарын арыйалларыгар эрэллээхпин. Кинилэр төрөөбүт улуустарын уонна өрөспүүбүлүкэлэрин ааттатар дьон буола улааталларыгар сөптөөх такайыыны биэрэллэригэр баҕарабын», — диэтэ регион салайааччыта.
Икки этээстээх оскуола иэнэ 2,6 тыһ кв м тахса, сменаҕа 150 оҕо киирэн үөрэнэр кыахтаах. Аныгы үөрэх процеһа барарыгар барыта тэриллибит: үөрэнэр кабинеттар, компьютернай кылаас, аахтабай саала, библиотека, аһыыр уонна ас астыыр сир.
Оскуола Саха сирин инвестиционнай бырагырааматыгар олоҕуран тутулунна уонна президент Владимир Путин көҕүлээбит «Үөрэх» национальнай бырайыак сыалларыгар сөп түбэһэр. «Намстрой» хампаанньа тутта.
Оскуола агротехнология хайысхалаах. Оҕолор сүөһү иитиитигэр, оҕуруот олордуутугар, автодьыалаҕа уонна тыраахтыры ыытыыга үөрэниэхтэрэ. Дуальнай үөрэхтээһин төрөппүттэр баҕа санааларын учуоттуур.
Бырагыраама чэрчитинэн оҕолор 2 разрядтаах иистэнньэҥ, 2 разрядтаах столяр, оҕуруот үүннэрээччи, 2 разрядтаах ЭВМ оператора уонна электро-ситими таҥааччы идэлээх бүтэрэллэр. Куурустарын бүтэрэллэригэр үөрэммиттэрин туоһулуур сибидиэтэлистибэ бэриллэр.
This post was published on 22.01.2025 14:01 14:01