«Мисс Россия — 2025» национальнай куонкуруска Саха сирин М.К. Аммосов аатынан Хотугулуу — Илиҥҥи федеральнай университет устудьуона Валентина Михайлова билиһиннэриэҕэ. Тэрээһин үөрүүлээх саҕаланыыта балаҕан ыйын 15 күнүгэр биллэриллэн, алтынньы 4 күнүгэр диэри салҕаныаҕа.
Валентина Михайлова омук филологиятын уонна регионоведениетын институтугар «английскай уонна кытай тылларын преподавателэ» идэҕэ үөрэнэр. Куонкуруска кыттарга эрдэттэн сүүмэрдээһини ааста. Дойду үрдүнэн барыта 90 тыһыынча кэриҥэ сайаапка киирдэ. Ол түмүгэр саха кыыһа 50 финалистка ахсааныгар киирэн, билигин сүрүн хоруона иһин киирсиэҕэ.
Валентина Михайлова кыра эрдэҕиттэн «Күн оҕолоро» устуудьуйаҕа үҥкүүлээн дьарыктаммыта уонна журналистика куруһуогар сылдьыбыта. Кини эрдэ Кытайга атастаһыы бырагырааматынан үөрэммитэ. Кыыс «Мисс Студенчество России» куонкуруска бастакы вице-мисс титул хаһаайкатынан буолар.
Валентина Михайлова бэйэтин телеграм-ханаалыгар федеральнай куонкуруска кыттарын туһунан үллэстибитэ. «МИСС РОССИЯ — кыра Али Вали ыра санаата. < … > Урут телевизорга “Мисс Россия” көрөр этим, билигин бэйэм кыттааччы буолабын», — диэн кыыс суруйда.
Санатан эттэххэ, 2024 сыллаахха Саха сирин «Мисс Россия» куонкуруска Аина Пудова көрдөрөн, онлайн куоластааһын түмүгүнэн топ-20 киирбитэ.
This post was published on 16.09.2025 12:13 12:13