2025 сыл тохсунньу 1 күнүттэн Саха сирин сорох нэһилиэнньэлээх пууннарыгар «туристическай нолуок» киирдэ — гостиницаларга, ыалдьыт дьиэлэригэр уонна да атын эбийиэктэргэ тохтообут ыалдьыттар эбии төлүүр харчылара. ЯСИА-ҕа туризм миниистирэ Тимур Ханды быһаарбытынан, билигин өрөспүүбүлүкэҕэ ыалдьыттары көрсөн түһэрэргэ бэлэм 200 сир баар.
«Аналитика көрдөрөрүнэн, 2024 сылга региоҥҥа 300 тыһыынча турист ыалдьыттаабыт. Биир киһиттэн 100 солк нолуок ыстаапкатыгар муниципалитеттар бюджеттарыгар эбии харчы киирэн, территориялар сайдыыларыгар үбүлээһин баар буоларыгар суоттаналлар. Киирбит үбү тупсарыныыга, туризм инфраструктурата сайдыытыгар, култуура тэрээһиннэрин ыытыыга уонна айылҕа эбийиэктэрин харыстааһыҥҥа тутталлар», — диэтэ миниистир.
Муниципалитеттар нолуок төлүүртэн босхолонор чэпчэтиинэн туһанар категориялары быһаарар кыахтаахтар. Испиэһэккэ байыаннай дьайыы бэтэрээннэрэ, доруобуйаларыгар хааччахтаах дьон, элбэх оҕолоох ыаллар киириэхтэрин сөп.
Билигин Саха сиригэр туристическай нолуок Дьокуускайга, Өлүөхүмэҕэ, Хаҥалас улууһун Тумул сэлиэнньэтигэр, Нерюнгри Чульман бөһүөлэгэр киирдэ. Маннык быһаарыыны муниципальнай тэриллиилэр депутаттара ылыммыттара.
Нолуок сынньанар сир дьиэтигэр олоруу төлөбүрүн сууматыттан 1%, ити эрээри сууккаҕа 100 солк кыччыа суохтаах. 2029 сылга 5% буолуоҕа.
Дьокуускай бюджета 4 мөл солк эбиллэрин суоттанар.
This post was published on 23.01.2025 15:09 15:09