«Бастыҥ муниципальнай практика» куонкурус кыайыылаахтарыгар бириэмийэ суумата кыччаата, ити эрээри ылар дьон ахсаана эбилиннэ — үс бириистээх миэстэ оннугар биэс буолла. Маннык көннөрүү бырабыыталыстыба уурааҕар олоҕурда. Муус устар 27 күнүгэр дьаһал олоххо киирдэ, суруйар «Парламентская газета».
«Бастыҥ муниципальнай практика» куонкурус 2017 сылтан ыытыллар. Былаас олохтоох уоргаттара кытталлар — муниципальнай уонна куорат уокуруктара уонна поселениелар (I категория), маны сэргэ тыа нэһилиэктэрэ (II категория).
Сыала — араас эйгэҕэ бастыҥ муниципальнай практикалары атыттарга холобур гынан көрдөрүү. Биэс номинациялаах: куораты тутуу бэлиитикэтэ уонна ОДьКХ, үбү салайыы, олохтоох нэһилиэнньэни кытта көдьүүстээх үлэ, норуоттар икки ардыларынааҕы эйэни бөҕөргөтүү, цифровой технологияны олоххо киллэрии.
Бу сылтан хас биирдии номинацияҕа үстүү буолбакка, биэстии кыайыылааҕы быһаарыахтара. Мантан сылтаан бириэмийэ суумата кыччаабыт буолуон сөп. Онон, куорат былаастара бастакы миэстэҕэ 50 мөл солк (75 этэ), иккискэ — 40 мөл солк (45). Үһүскэ уларыйбат — 30 мөл солк. Төрдүскэ уонна бэһискэ — 20 уонна 10 мөл солк, туһааннааҕынан.
Иккис категорияҕа «Кыһыл көмүс» призёрдар — 20 мөл солк ылыахтара, ааспыт сылтан 5 мөл солк кыра. «Үрүҥ көмүстэргэ» уруккунан хаалла — 15 мөл солк. «Боруонсаларга» 7 мөл солк бэриллиэҕэ (10 этэ). Төрдүс, бэһис миэстэлэргэ 5 уонна 3 мөл солк, туһааннааҕынан.
2021 сыллааҕы бириэмийэ уопсай пуондата 1 миллиард солк, бу туһунан бырабыыталыстыба саайтыгар суруллар.
