Өрөспүүбүлүкэ спортка миниистирэ Михаил Гуляев Ил Түмэн дьокутаата, спорт национальнай көрүҥнэригэр Манчаары аатынан «Модун» киин дириэктэрэ Иннокентий Григорьев, уо.д.а. Үөһээ Бүлүүттэн төннөн иһэн Бүлүү куоратыгар үлэлэрин чэрчитинэн сырыттылар.
Манна кинилэр спорт эбийиэктэрэ хайдах туруктаахтарын көрдүлэр. Ол курдук эргэ тутуулары: Бүлүүтээҕи педколледж спортивнай саалатын, «Уолбут» стадиону, «Химия» арочнай саалатын сиһилии көрдүлэр, сүбэлэһии бэрээдэгинэн иҥэн-тоҥон кэпсэттилэр.
«Оленск» стадион таһыгар баар спорт саалатын тута сылдьар специалистары, тутааччылары көрсөн, үлэ хайдах баран иһэрин ыйыталастылар. Манна билигин А.А.Харлампьев 18 киһилээх биригээдэтэ үлэлии сылдьар. Министр эбийиэги тутуу үлэтэ үчүгэйдик баран иһэрин бэлиэтээтэ.
Ити кэнниттэн делегация улуус, куорат салалталарын уонна спортивнай актыыбын кытта көрсүһүүгэ бу оробуочай сырыы түмүгүнэн спорт миниистирэ Михаил Гуляев маннык бэлиэтээһиннэри оҥордо:
«Бүлүүтээҕи педколледж спорт саалата олус эргэрбитинэн, саахалланар кутталлааҕынан көтүрүллэр суолга киирбит. Ол гынан баран, «Химия» саалатын БПК-ҕа биэрэр табыгаһа суох диэн көрдүм», — диир кини.
Маны таһынан «Уолбут» стадиоҥҥа үчүгэйдик бырайыактатан, площадка оҥорон, бу эбийиэги тилиннэрэр наадатын ыйда. Тутууну, сирин-уотун көрүүнү-истиини педколледжка бэриллиэн сөбүн, оччотугар стадион «иккис тыынын” ылыан сөбүн бэлиэтээтэ. «Итиннэ улуус, куорат дьаһалталара, педколледж бары түмсэн үлэлиэхтээхтэр. Оонньуур площадкаҕа биһиги сайаапкалары ылабыт, төһө кыалларынан көмөлөһүөхүт, ол гынан быйыл буолбатах”, — диир кини.
«Химия» спорт саалатын өрөмүөннүүр, икки дьоҕус саалалар ороскуоттарын бюджеккэ киллэрэр ордугун кини эттэ. «Улууска спорт сайдарыгар сыаллаахтык-соруктаахтык, дьулуһуулаахтык үлэлииргит тута көстөр. Стадион, манеж бааллара, теренердэр үчүгэй үлэлэрин үтүө түмүгэ биллэн эрэр диэххэ сөп. Ону быйылгы «Азия оҕолоро» VI спортивнай оонньууларга оҕолоргут миэстэлэспиттэрэ туоһулуур. Инникитин тренер ахсаанын өссө элбэтиэххэ наада. Спорт национальнай көрүҥнэрин ордук күүскэ сайыннарыахтааххыт», — диэн кини ойуччу тутан эттэ.
Спорт саҥа саалатын тутарга сметаҕа эрэ уларыйыы баар, онон смета билиннэҕинэ эрэ куонкурус биллэриллэрин, коммуникациятыгар, ититиитигэр, толору хааччыллыытыгар аукцион ыытылларынан бытаарыы тахсыан сөбүн, ону түргэтэтэргэ дьаһал ылыллыаҕын тустарынан кини эттэ. Саҥа саала быйылгы сылга үлэҕэ киириэхтээх.
Миниистир М.Д.Гуляев куорат дьаһалтата (А.Г.Шипков) Парт.Семенов уулуссатыгар спорт саалатын туттаран үлэҕэ киллэрэр түбэлтэтигэр оборудованиетын булууга көмөлөһөргө бэлэмин уонна Бүлүүтээҕи педколледжка омук тылын билэр тренердэри бэлэмнээн таһаарар былааннаахтарын, онно сөптөөх базалаахтарын көрөн биһирээбитин эттэ.
