Социальнай ситимнэргэ уол оҕо ийэтин, аһыы утаҕы иһэрин иһин, төрөппүт быраабыттан быһыахтарын баҕаралларын туһунан иһитиннэрэр видеота тарҕанна. Уол ытаан-соҥоон кинини бииргэ төрөөбүттэрин кытта оҕо дьиэтигэр илдьэ барбаттарыгар көрдөһөр. Балаһыанньаны Саха сирин оҕо омбудсменэ Туйаара Васильева быһаарда.
Быһаарбыттарынан, уол үс оҕолоох дьиэ кэргэҥҥэ төрөөбүт, аҕалара 2022 сыллаахха ыалдьан өлбүт.
«Оҕо быраабыгар боломуочунай аппарата эрдэ аҕалара өлбүтүн кэннэ ситэри докумуоннаспатах кыбартыыраларын боппуруоһун быһаарыыга үлэлэспит. Кыбартыыраны оччолорго суутунан ылбыттар. От ыйыгар опека органнара ийэни төрөппүт быраабыттан быһарга суукка биэрбит, суут ийэни төрөппүт быраабыгар хааччахтааһын туһунан быһаарбыт», — диэн балаһыанньаны Саха сиригэр оҕо быраабыгар боломуочунай Туйаара Васильева бэйэтин ВК-сирэйигэр суруйда.
Омбудсмен оҕо ийэтин кытта сибээстээҕин, арыгыттан эмтэнии наадатын туһунан кэпсэтии ыытыллыбытын эттэ.
«Ийэ эмтэнэргэ сөбүлэһэр. Билигин кини үрдүкү суукка апелляциялаах үҥсүү түһэрдэ. Бу боппуруос мин хонтуруолбар сылдьар. Дьиэ кэргэҥҥэ, ол иһигэр реабилитацияны ааһыыга, оҕолор түргэнник дьиэ кэргэҥҥэ төннөллөрүгэр көмөлөһүөхпүт», — диэн эбэн эттэ Туйаара Васильева.
This post was published on 25.08.2025 11:29 11:29