Балаҕан ыйын 27 күнүгэр Мииринэй оройуонун Быыһыыр сулууспатыгар “Мииринэйтэн Чернышевскайга айанныыр суол 56 килэмиэтиригэр икки суукка собуоттаммыт массыына хамсаабакка турар” диэн тыллааһын киирбит.
Ыйыллыбыт миэстэҕэ тиийбит полиция үлэһиттэрэ массыынаҕа ким да суоҕун, оттон чугастыы Бүлүү өрүскэ киһитэ суох мотуордаах тыы уста сылдьарын булбуттар. Тыыттан илим түһэриллибит эбит. Ол күн Ленскэй ПСО үлэһиттэрэ тиийэн квадрокоптер көтүппүттэр уонна өрүс кытылыгар эр киһи өлүгүн булбуттар.
Саха сирин быыһыыр сулууспата сэрэтэр: ууга барыаххыт иннинэ күн-дьыл билгэтигэр болҕомтоҕутун ууруҥ, быыһыыр жилеты илдьэ сылдьыҥ уонна тэйиччи сиргэ соҕотох барартан туттунуҥ.
Егор Карпов, Саха сирэ
This post was published on 29.09.2023 13:06 13:06