Анал байыаннай дьайыы саҕаланыаҕыттан дойду үрдүнэн «Золотые руки Ангела» волонтердар уопсастыбаннай аһымал тэрилтэлэрэ арыллыбыта. СВО кыттыылаахтарын олус наадалалаах малларынан хааччыйыыга үлэлииллэр. Мииринэйгэ маннык штабы Ирина Бурлова арыйбыта.
Биир сыл иһигэр көхтөөх дьон байыастарга олус наадалаах 10 тыһ тахса малы оҥорон таһаарда: наһыылкалар, харыстанар илимнэр, балааккалар, таҥас куурдунар маллар, аптечкалар, повязкалар уо.д.а. Билигин штабка баҕа өттүнэн кэлэн үлэлэһэр дьон ахсаана — 550 киһи.
«Биһиги аадырыстаах көмөнү оҥоробут. Баар испииһэгинэн атыылаһабыт, бөлөх администратордара табаары ылаллар. Дойду араас муннугуттан баһыылкалар кэлэллэр. Мииринэйдэр хоруопкалары, бакыаттары аҕалаллар. Биһиги таһаҕаһы бэлэмниибит, араас минньигэһи угабыт, хайаан да саллааты өйүүр сурук суруйабыт, массыынаҕа уган, аэропортка илдьэбит. Баһыылкалар салгыы СВО территориятыгар бараллар. Бастакы маннык тэрээһин 2022 сыл алтынньытыгар буолбута. Күүһү, бириэмэни, сириэстибэни харыстаабакка хамаанда — анал байыаннай дьайыы кыттыылаахтарын ийэлэрэ, кэргэннэрэ, оҕолоро, биэнсийэлээхтэр уонна Мииринэй олохтоохторо — мобилизация саҕаланыаҕыттан байыастарга көмөлөһөллөр», — диэтэ Ирина Бурлова.
