Кини алтата сууттаммыт, түөрт төгүл хаайыыга олоро сылдьыбыт. Эдэр оҕо эрдэҕиттэн дьону халыыр, уорар, охсуһар, ороспуойдуур, массыыналары уорар, уматар дьарыктаах эбит. Куруук эр киһилии таҥна сылдьар, эр киһи курдук туттар-хаптар. Кини бэйэтин «олоҕун суолун сүтэрбит», буккуллубут киһинэн ааҕынар.
“Пацанки” биэриигэ кини курдук сууттаммыт, иһэр-аһыыр, охсуһар, быһата, мөлтөх бэрээдэктээх кыргыттар “Леди оскуолатыгар” кэлэн, олохторун суолун көннөрөргө, уопсастыбаҕа киирэргэ, бэйэ бодотун тардына сылдьарга, кэрэни өйдөөн көрөргө, таптыырга, бырастыы гынарга, о.д.а. үөрэнэллэр. Бу үһүс сезоҥҥа 12 кыттааччыны талбыттар.
Кэрэхсэбиллээҕэ диэн, реалити-шоуга дьиҥнээх күлүгээннэри ыҥыран баран, көнөр суолга туруораллар. Урукку олохторо кинилэргэ бэйэлэригэр, дьоҥҥо куһаҕаннык дьайарын өйдөтөллөр. Бу, биэриигэ кыттыбатах ыччакка эмиэ өйдөтөр ньыма буолар. Биэриигэ кыттыы — улахан истириэс. Тоҕо диэтэр, манна бары күлүгээн кыргыттар мустаннар, бастаан бэрт былдьаһан охсуһаллар, иһэллэр-аһыыллар да. Онтон сыыйа көнөр суолга туруналлар. Кинилэр бары да ыарахан олохтоох кыргыттар. Төрөппүттэрэ иһэр-аһыыр буолан, ийэ-аҕа тапталын билбэккэ, үксүгэр маннык олоххо тиийдэхтэрэ.
Зарина бэйэтин ийэтэ өлбүтүгэр буруйдааҕынан ааҕынар. Кини хаайыыга олордоҕуна өлбүт, кыыһа тосту-туора быһыыланарыттан улаханнык санаарҕыыр, айманар эбит. Кыыс “Леди оскуолатыгар” үөрэнэн, олоҕун тосту уларытыан, көнүөн баҕарар. Иккис биэриигэ кини курдук эр киһилии моһуоннаах, «Депутат» диэн хос ааттаах кыыс баара. Ол кыыс бүтэһигэр син көнөн, тупсан барбыта. Зарина эмиэ «Депутат» оруолун толоруо диэн көрөөччүлэр тойоннууллар.
Ангелина Васильева, “Саха сирэ” хаһыат, edersaas.ru
