Мииринэй оройуонугар Арыылаахха ойуур баһаарыттан дьиэлэрэ умайбыт икки ыалга, көмөнү оҥорор туһунан өрөспүүбүлүкэтээҕи суһал ыстаап баһаары уонна ыксаллаах быһыы-майгы тахсыытын бохсор хамыыһыйатын киэһээҥҥи сүбэ мунньаҕар көрдүлэр.
Мунньаҕы СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников салайан ыытта.
— Билиҥҥи туругунан үс барыйаан көрүүгэ сылдьар. Бастакыта — Арыылаах нэһилиэгэр «АЛРОСА» хампаанньа суотугар саҥа дьиэни тутуу. Иккиһинэн — Мииринэй куоракка кыбартыылары атыылаһыы. Үсүһүнэн, эмсэҕэлээбит дьоҥҥо харчынан биэрии — ол харчынан ханна дьиэ тутталларын дуу, атыылаһалларын дуу бэйэлэрэ быһаарыахтара«, — диэн мунньахха Мииринэй оройуонун баһылыга Александр Басыров быһаарда.
Елена ПОТОЦКАЯ, «Саха сирэ» хаһыат
This post was published on 03.08.2022 15:14 15:14