Ахсынньы 4-14 күннэригэр Саха сирин бастакы бэрэсэдьиэнэ Михаил Ефимович Николаев 85 сааһын туолар үбүлүөйүгэр аналлаах III өрөспүүбүлүкэтээҕи саахымат конгреһа ыытыллар, диэн СИА кэпсиир.
Саахымат оскуолата бэҕэһээ Өктөмҥө баар Наука алын академиятын үөрэҕин куорпуһугар саҕаланна. Үөрэҕи норуотттар икки ардыларынааҕы гроссмейстер, Арассыыйа чемпиона Антон Шомоев ыытар.
Кини кыттааччылар төһө да кыра саастаахтарын иһин, саахымат сорудахтарын үөрэ-көтө быһаараллар, ону тэҥэ ырытыыга көхтөөх кыттыыны ылалларын бэлиэтээтэ: «Мин санаабар, саахымат оҕону элбэххэ үөрэтэр, боростуой кэпсэтииттэн саҕалаан, ырытар толкуйдуур дьоҕурдарын сайыннарар. Ону тэҥэ оҕолору чиэһинэйдик оонньуурга көҕүлүүр, бу спорт биир көрүҥэ буоллаҕа», — диэн Антон Шомоев бэлиэтиир.
Конгресс биир чаҕылхай кыттыылааҕынан Бурятияттан сылдьар Баир Имыхелов буолар. Баир саахымаччыттар дьиэ кэргэн оҕото, кини быйыл Уһук Илин уокуруктааҕы «Город у моря» бэстибээлгэ ситиһиилээхтик кыттыбыта. Ийэтэ Дарима Имыхелова этэринэн, оҕото саахыматынан 4 сааһыттан саҕалаан интэриэһиргээбит. Инньэ гынан, тренердары кытары сүбэлэһэн баран, дьарыктаан саҕалаабыттар.
«Мин эһээм, аҕам, ийэм уонна кыра балтым Таня бары саахыматтыыллар», — диэн Баир Имыхелов үллэстэр.
Конгресс чэрчитинэн региоҥҥа саахымат спордун уонна үөрэх сайдыытын боппуруостарын ырытыахтара. Саха сирин саахымакка сүүмэрдэммит хамаандатын старшай тренерэ Роман Ганжуров этэринэн, бу конгресс сүрүн уонна тутаах тэрээһинэ буолуоҕа.
«Биһиэхэ регионнааҕы үөрэх министиэристибэтигэр саахымат үөрэҕин сайыннарыыга кэккэ дьоһуннаах быһаарыылардаахпыт уонна этиилэрдээхпит», — диэтэ Ганжуров.
«Биһиги спортсменнары бэлэмнээбэппит, биһиги чуолкай наукаларга күүстээх оҕолору бэлэмниибит», — диэн Саха Өрөспүүбүлүкэтин алын наукатын академиятын ректора Василий Павлов этэр. Кини этэринэн, оҕо сылдьан саахыматтаабыт оҕолор үрдүкү кылааска үөрэхтэригэр ситиһиилээх буолаллар. Конгресс хаһыс даҕаны сылын ыытыллар буолан, Саха сиригэр бу көрүҥ сайдыылаах соҕус эрээри, бүтүн Уһук Илин уокурукка сайдарын ситиһиэххэ наада диэн ректор чопчулуур.
Хаартыскалар СӨ саахымакка Федерация телеграм-ханаалыттан
