19 Кулун тутар 19.03
  • -12°
  • $ 91,98
  • 100,24

Мэйик нэһилиэгэр саҥа талыллыбыт баһылык үлэтин куоракка олорор биир дойдулаахтарыгар кэпсээтэ

10:31, 10 ноября 2022
Текст:
Читайте нас на
Яндекс Новости
ЯДВ

Төрөөбүт төрүт дойдуттан, атын сиргэ олохсуйан олорор дьон ханна баҕарар элбэх. Быйыл күһүҥҥү быыбардар кэннэ элбэх нэһилиэккэ саҥа баһылыктар талыллан үлэлии сылдьаллар. Үөһээ Бүлүү улууһун Мэйигэр нэһилиэк аҕа баһылыгынан Яковлев Иван Игоревич талыллыбыта.

Бу күннэргэ саҥа баһылык Иван Яковлев Дьокуускай куоракка олорор биир дойдулаахтарын кытта көрүстэ. Туох үлэ ыытылларын, инники былааннарын туһунан иһитиннэрии оҥордо.

«Ыал — аҕатынан» диэн бэргэн этиини олоххо киллэрэн, нэһилиэккэ аҕалар түмсүүлэрэ тэриллибт, онно аҕалар эрэ буолбакка эр хоһууттар кыттыыны ылаллар. Бастакы түмсүү үлэтинэн олохтоохтору муҥхаҕа мунньан таһаарыы үтүө холобур буолбут. Дойду үрдүнэн байыаннай хомуурга кыракый нэһилиэк олохтоохторугар эмиэ сыһыаннаах, онон туох кыалларынан кинилэр дьиэ кэргэттэригэр тустаах көмө оҥоһуллара этилиннэ.

Тыа хаһаайыстыбатын сайыннарыыга элбэх үлэ ыытылларынан, Иван Игоревич тустаах министиэристибэҕэ соруктаах сылдьар.

Мунньахха урукку нэһилиэк салайааччылара Андреев В.С., Тимофеев К.Е., Яковлев С.В. кыттыыны ыллылар. Салайааччы туохха болҕомто ууруохтааҕын, итэҕэс-быһаҕас быһаарыллар боппуруостарыгар  сүбэлэрин эттилэр.

«Мэйик» түмсүү Туймаада хочотугар 2000 с. бастакынан  биир дойдулаахтарын түмэн ыһыаҕы тэрийбитэ. Билигин даҕаны түмсүү үрдүк таһымнаахтык үлэлиир. Салайааччыларынан араас кэмнэргэ Ю.Бускаров, К.Тимофеев,  У.Яковлева этилэр, кинилэр түмүүлэринэн араас тэрээһиннэр буолаллар. Дойдубут дьонугар хаһан баҕарар көмө, сүбэ-соргу буолабыт. Бу да мунньахха бэйэлэрин санааларын эдэр баһылыкка тиэрдээри Федоров А.Г., Догуев В.В. ыччат дьонтон Иванов В.Г. уо.д.а кэлбиттэр.

Мэйиккэ ордук сытыытык турбут боппуруоһунан саҥа оскуола тутуута, нэһилиэк иһин тупсарыы, ыччат дьоҥҥо үлэ миэстэтин таһаарыы, уолбут күөллэр оннуларыгар саҥа күөллэри оҥоруу, суол-иис, олохтоох сирдэри докумуоннааһын курдук этиилэр буоллулар. Маай учаастагар нэһилиэккэ көрүллэр үптэн аныылларыгар туруорустулар. Кинилэр кыһалҕаларын сөптөөхтүк быһаарсарыгар анаан дьаһалтаҕа 0.5 ставкаҕа специалист аныыллара буоллар диэн этиннилэр.

Оскуолаҕа оҕо хайдах билиини ыларыттан нэһилиэк сайдыта эмиэ тутулуктанар. Ханнык баҕарар предметка анал үөрэхтээх учуутал үөрэтэрин туруорустулар. Спорт курдук эт-хаан сайдыытын, өй -санаа толкуйун тобулар көрүҥү сайыннарыы хайаан да наада диэн буолла.

Маны сэргэ Амма улууһугар кийиит буолан олохсуйбут, элбэх оҕолоох герой ийэ Дария Степановна Накытова уонна Николай Петрович Винокуров кыыстара Маргарита Лазарева нэһилиэккэ музей сөргүтүллэн тэриллэрин туруоруста, урукку олорбут дьиэлэрин миэстэтигэр музей тэрийэргитигэр көҥүллүүбүн диэн эттэ.

Нэһилиэккэ музей баар буолара хайаан да наада. Ити Винокуровтар аймах уруккуттан даҕаны норуот туһугар элбэх үлэн ыыппыт дьон. Кинилэри   ыччат дьон киэн тутта билиэхтээх.

Түмүккэ Мэйиктэн куоракка олохсуйбут дьон испиэһэгин сөргүтүөххэ, ыччаты кытта ыкса ылсан үлэлиэххэ уонна төһө оҕо анал үөрэххэ үөрэнэ сылдьарын чуолкайдаан, түмсүү үлэтигэр сыһыарыахха диэн буолла. Бу күнтэн ыла түмсүүнү салайарыгар Константин Тимофеевы бигэргэттилэр.

Ааптар: Марина Винокурова

Следите за самым важным и интересным в Telegram-канале и WhatsApp-группе ЯСИА