Тымныы уу төлөбүрүн кээмэйдиир тэрил кыбартыыраҕа суох буоллаҕына, төлөбүр икки төгүл улаатыаҕа. Бу туһунан Россия бырабыыталыстыбатын докумуоннарыгар сигэнэн РИА Новости иһитиннэрэр.
Тымныы уунан хааччыйыы төлөбүрүн суоттааһын быраабылатыгар сөптөөх уларытыылар киирдилэр. Учуоттуур тэрили туруорунар кыах баар эрээри, онтулара хаһан да суох кыбартыыраларга, дьиэлэргэ бу уларыйыы туттуллуоҕа. Маннык түгэннэргэ квитанцияҕа түмүк суума — туһаныы нормативыгар, тарыыбыгар, олорор дьон ахсааныгар уонна анал коэффициеҥҥа олоҕуран оҥоһуллар.
Урут тымныы ууга улаатыннарар коэффициент 1,5-гэ тэҥнэһэрэ, билигин 3-гэр диэри улаатта. Оттон итии уунан хааччыйыыга, ууну таһаарыыга уонна уотунан хааччыйыыга анал көрдөрүү урукку таһымҥа — 1,5 хаалыаҕа.
This post was published on 26.01.2026 10:19 10:19