Бүгүн «Манчаары оонньуулара» спорт национальнай көрүҥнэригэр XXII-с спартакиадатын уота Баһылай Манчаары киинэ түспүт Арыылаах алааһыттан саҕыллан айаҥҥа турунна, диэн Мэҥэ Хаҥалас улууһун баһылыга Дмитрий Тихонов иһитиннэрэр.
«Быйылгы оонньуу Баһылай Манчаары төрөөбүтэ 220 сылыгар сөп түбэспитэ биһиэхэ, биир дойдулаахтарыгар ураты суолталаах. Саха норуота кэтэһэр, дьону-сэргэни сомоҕолуур оонньуулар уоттара айаҥҥа туруммутунан спорду таптааччыларга, сахабыт сирин бары олохтоохторугар эҕэрдэбин тиэрдэбин. Ытык Таатта сиригэр күүтүүлээх түһүлгэбит үрдүк таһымҥа аастын», — диэн Дмитрий Тихонов эҕэрдэлээтэ.
От ыйын 7-13 күннэригэр Таатта улууһугар өрөспүүбүлүкэбит ааттаах-суоллаах спортсменнара спорт национальнай көрүҥнэригэр илин-кэлин түсүһэн бастыҥнары быһаарыахтара.
This post was published on 20.06.2025 16:16 16:16