Ааспыт өрөбүллэргэ Аммаҕа Үрдүкү лигаҕа эр дьон хамаандаларын ортолоругар волейболга Саха сирин чемпионата буолла. Дьокуускай куорат, Амма, Ленскэй, Уус Алдан, Таатта, Өлүөхүмэ, Чурапчы, Мэҥэ Хаҥалас улуустара кытыннылар. Ол туһунан УФКуоМС пресс-сулууспата суруйда.
Түмүктүүр күҥҥэ былаһааккаҕа Таатта волейболистара уонна турнир хаһаайыттара аммалар тахсаллар, боруонсаны былдьаһаллар. Былырыыҥҥы финалистар таатталар бастакы ыарахан партияны мүччү түһэн, аммалары 3:0 ахсааҥҥа кыайаллар.
Финал дьиҥнээх сенсация буолар. Мэҥэ Хаҥалас хамаандата уонна былырыыҥҥы чемпион Дьокуускай сүүмэрдэммит састааба тахсаллар. Мэҥэ хаҥаластар финалга эрэ тахсыбаттар, «сухую» хотоллор, куораттарга туох да шансы хаалларбаттар. Бу триумф историяҕа киирдэ – мэҥэ хаҥаластар бастакыларын өрөспүүбүлүкэ чемпиона буоллулар.
Чемпионат түмүгүнэн биирдиилээн номинациялар бэрилиннилэр:
- Бастыҥ көмүскээччи – Дархан Ефремов (Таатта);
- Бастыҥ сибээстээччи – Василий Афанасьев (Мэҥэ Хаҥалас);
- Бастыҥ кимэн киирээччи – Василий Тум-Фа-Ли (Дьокуускай);
- Бастыҥ оонньооччу – Айтан Кириллин (Мэҥэ Хаҥалас).
This post was published on 10.03.2025 16:01 16:01