Быйылгы кыстыгы көрсө, бас билии көрүҥүттэн тутулуга суох, өрөспүүбүлүкэ үрдүнэн 434 334 туоннаны оттуур, 13 443 туонна сенаһы оҥорор, 24 184 туонна сиилэһи угар сорук туруоруллубута, суруйда Саха парламент саайт.
Тыа хаһаайыстыбатын уонна ас-үөл бэлиитикэтин министиэристибэтин чахчытынан, балаҕан ыйын 18 күнүнээҕи туругунан, 400 389 туонна от оттонно (былаан 92 %-а), 25 610 туонна сиилэс угулунна (106 %), 8 907 туонна сенаж (66 %) оҥоһулунна.
Биирдиилээн улуустарынан ылан көрдөххө, саамай улахан (44 369 туонна) былааннаах Мэҥэ Хаҥалас улууһа 44 852 туоннаны оттообут. Бу курдук сорудахтарын куоһардылар: Амма улууһа 33 941 (30 650), Уус Алдан улууһа 31 288 (31 000), Үөһээ Бүлүү улууһа 24 385 (24 343), Өлүөхүмэ улууһа 16 155 (14 290), Жатай 450 (350). Оттон Чурапчы улууһа 37 689, Ньурба улууһа 27 859, Нам улууһа 27 371 туонна, Бүлүү улууһа 21 493 туонна, Кэбээйи улууһа 9 862 туоннаны чөкөтөннөр, кыстыыр отторун хааччынарга эрэллээхтэр. Амма, Горнай, Нам, Таатта, Томпо, Уус Алдан уонна Хаҥалас улуустарыгар, барыта холбоон 175 мобильнай биригээдэ тэриллэн, 24 918 туонна оту кэбистилэр.
Хотугу улуустартан Дьааҥы улууһа 4 777, Орто Халыма улууһа 4 352, Эбээн Бытантай улууһа 639 туонна оту хааччыннылар. Өймөкөөн улууһугар ходуһалары халаан уута былдьаан, олохтоохтор ханна сир тахсарынан уонна ууну кэһэ сылдьан оттооннор, 1 905 туоннаны чөкөттүлэр. Билигин баар сүөһүнү-сылгыны сүтүгэ суох кыстатарга аны 1 100 туонна от наада, ону уу суолун баттаһа тиэрдэр сорук туруоруллан, киин улуустартан балаҕан ыйын 9 күнүттэн саҕалаан тиэйэ сылдьаллар.
Былааннарын толоро илик улуустар отчуттара билигин даҕаны ходуһаттан тахса иликтэр, сорох улуустар сибидиэнньэлэрин ситэ түһэрбэтилэр, маны таһынан, ааспыт кыстыктан ордубут 15 500 туонна кур от баар, инньэ гынан, кыстыкка 426 тыһыынча туонна оттоох киириэхпит, онно от-бурдук эбиллиэҕэ диэн министиэристибэ Сүөһү аһылыгын бэлэмнээһиҥҥэ суһал ыстааба эрэллээхтик этэр.
